Senatorlarǵa otandyq zeńbirek tanystyryldy
ASTANA. QazAqparat - Búgin QR Parlamenti Senatynyń depýtattary «Qazaqstan Paramaýnt Injınırıng» mashına jasaý kásipornynda bolyp, otandyq jańa zeńbirekti kórdi, dep habarlaıdy QazAqparat tilshisi.
Jańa zeńbirek QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva bastaǵan komıtet múshelerine tanystyryldy.
Qazirgi ýaqytta zaýyt uńǵysy 30 mm bolatyn otandyq «Ańsar» zeńbiregimen qosarlanǵan 7,62 uńǵyly qashyqtan basqarylatyn pýlemet qondyrylǵan 8x8 dóńgelekti «Barys» bronetransporterin synaqtan ótkizýge kirisken. Zeńbirek kólik júrip kele jatqan kezde de kózdegen nysanyna dóp tıgizýge qaýqarly. Ol úshin qashyqtaǵy nysandy dál kózdep, onymen aradaǵy qashyqtyqty týra anyqtaıtyn qurylǵymen jabdyqtalǵan.
«Bul qorǵanys tehnıkasy tolyqtaı qazaqstandyq óndiris sanalady. Bir modýldi jasap shyǵýǵa alty aı ýaqyt ketedi. Al kompıýterden azdaǵan habary bar kez kelgen adam bul tehnıkany jarty kúnniń ishinde ıgere alady», - dedi «Weapon System Engineering» JShS-niń qarý-jaraq jónindegi dırektory Vıacheslav Krıvorog.
