Senatorlardyń óńir turǵyndarymen kezdesýlerinde qandaı máseleler kóterildi
Júzdesýlerde ózekti máseleler talqylanýda, kúrdeli máselelerdiń sheshimin tabý joldary izdestirilýde. Sol kezdesýler týraly aqparattar toptamasyn nazarlaryńyzǵa usynamyz.
QR Parlamenti Senatynyń depýtaty Bekbol Orynbasarov Mańǵystaý oblysyndaǵy Túpqaraǵan, Beıneý jáne Mańǵystaý aýdandary máslıhattarynyń depýtattarymen jáne óńir turǵyndarymen kezdesti. Senator sapar barysynda depýtattardyń aldynda turǵan negizgi mindetter men maqsattar, sondaı-aq senatorlar júrgizip jatqan jumys týraly kezdesýlerge qatysýshylarǵa aıtyp berdi. Senator máslıhat depýtattarymen birlesip halyqtyń ákimdiktermen ózara is-qımyly máselelerin, sondaı-aq qoǵamdyq baqylaýdy kúsheıtý jónindegi jumystyń mańyzdylyǵyn talqylady. Ol sondaı-aq óńirdiń ekologııalyq qaýipsizdigi máselelerine jeke toqtaldy.
***
Qazaqstan Respýblıkasy Parlamenti Senatynyń depýtaty Bekbolat Orynbekov Jambyl oblysy Shý aýdanynda boldy jáne aýdandyq máslıhat depýtattarymen kezdesip, saılaýshylardyń usynystaryn tyńdady. Kezdesý barysynda Tasótkel sý qoımasy men Shatyrkól ken ornyna qatysty problemalyq máseleler de talqylandy. Senator Orynbekov 300 oqýshyǵa arnalǵan ál-Farabı atyndaǵy orta mekteptegi qurylys jumystarynyń barysymen tanysty. Depýtat qurylys sapasyn baqylaýdyń mańyzdylyǵyna aýdan basshylyǵynyń nazaryn aýdardy. Bekbolat Orynbekov kezdesý barysynda sondaı-aq QR Parlamenti Senatynyń jumysy týraly jerlesterine aıtyp berdi.
***
QR Parlamenti Senatynyń depýtattary Altynbek Nuhuly men Ernur Áıtkenov Pavlodar oblysynda boldy jáne óńirdiń áleýmettik-ekonomıkalyq damý kórsetkishterimen tanysý úshin aımaq basshylyǵymen kezdesti. Depýtattar Pavlodar qalasyndaǵy №2 jylý energetıkalyq ortalyǵynda da boldy. Senatorlar JEO-daǵy óndiris jumysymen tanysty jáne salalyq tsehtarda bolyp, Ekibastuzdaǵy ótken jylǵy tótenshe jaǵdaıǵa uqsas avarııalardy boldyrmaý úshin jumystardy jandandyrýdyń mańyzdylyǵyn atap ótti.
***
Qazaqstan Respýblıkasy Parlamenti Senatynyń depýtaty Ásem Rahmetova Soltústik Qazaqstan oblysynda boldy. Depýtat Esil aýdanyna sapar barysynda jergilikti aýrýhananyń emdeý korpýsyn jóndeý barysymen tanysty. Senator aýyl turǵyndarymen kezdesý barysynda sýmen jabdyqtaý, joldardy jóndeý jáne ınternetke qoljetimdilikti qamtamasyz etýge qatysty ózekti máselelerdi talqylady. Óńir turǵyndary kezdesý barysynda suraqtar qoıyp, memlekettik járdemaqylardy esepteý erekshelikteri men zeınetaqy aýdarymdaryn tóleý tártibin jáne basqa da máselelerdi túsindirýdi ótindi.
***
QR Parlamenti Senatynyń depýtaty Evgenıı Bolgert Qaraǵandy oblysynda Qazaqstan halqy Assambleıasynyń, Kásipkerler qaýymdastyǵynyń ókilderimen jáne jastarmen kezdesti. Senator kezdesý barysynda bıznestiń quqyqtary men múddesin qorǵaý, kásipkerlik salasyndaǵy ınnovatsııalyq jobalardy iske asyrýǵa qoldaý jasaý, etnostardyń tarıhı shyqqan elderinen Qazaqstanǵa ınvestıtsııa men tehnologııa tartý jónindegi usynystardy tyńdady. Evgenıı Bolgert sonymen qatar VIII shaqyrylymdaǵy QR Parlamenti Senatynyń birinshi sessııasynyń qorytyndylary týraly da aıtty. Depýtat sonymen qatar nemis mádenı ortalyǵynda bolyp, nemis jastar klýbynyń qyzmetkerlerimen jáne ókilderimen kezdesti.
***
QR Parlamenti Senatynyń depýtattary Nurııa Nııazova, Zakırjan Kýzıev jáne Janna Asanova respýblıkalyq jáne qalalyq etnomádenı birlestikterdiń, sondaı-aq Qazaqstan halqy Assambleıasynyń Almaty qalasyndaǵy qoǵamdyq qurylymynyń basshylarymen jáne aktıvimen kezdesti. Senatorlar qazirgi zamanǵy bilim men ǵylymnyń sapasy, halyqtyń áleýmettik qamsyzdandyrylýy men densaýlyǵy, etnomádenı birlestikterdiń qyzmetin damytýǵa memlekettik granttar bólý, etnosaralyq qaqtyǵystardyń aldyn alý, aqparattyq qaýipsizdik jáne t.b. máselelerdi etnomádenı birlestikterdiń ókilderimen birge talqylady.
***
Qazaqstan Respýblıkasy Parlamenti Senatynyń depýtaty Rýslan Rústemov Qyzylorda oblysyndaǵy Syrdarııa aýdanynyń turǵyndarymen kezdesti. Depýtat sapar barysynda óńirdegi birqatar eldi mekenderinde bolyp, jerlesterimen júzdesti. Sapar aıasyndaǵy barlyq kezdesýler men sharalar barysynda elimizde júrgizilip jatqan konstıtýtsııalyq reformalar, Parlament qabyldaǵan zańdar men Prezıdenttiń bastamasy boıynsha qabyldanǵan sharalar týraly jan-jaqty pikir almasyldy.
***
Senator Sultan Dúısembınov Talǵar aýdanynda bolǵan kezde birqatar áleýmettik nysandardy aralady jáne turǵyndarymen kezdesý ótkizdi.
Senator Talǵar qalasyndaǵy 136 bala tárbıelenetin jáne 18 tárbıeshi jumys istep kele jatqan №8 balabaqshada boldy. 1964 jyly salynǵan bul balabaqshada áli kúnge deıin jóndeý jumystary jasalmaǵany týraly depýtat habardar etildi. Senator sapar barysynda jylyjaı jumysymen de tanysty. Depýtat bul nysannyń jumysy óńir ekonomıkasynyń damýyna oń áserin tıgizetinin atap ótti.
***
QR Parlamenti Senatynyń depýtaty Sergeı Ershov Qaraǵandy oblysynda bolyp, jergilikti turǵyndarmen, máslıhat depýtattarymen jáne saılaýshylarmen kezdesti. Júzdesý barysynda senatorǵa orman alqaptarynda, eldi mekenderde jáne oblystyń dalalyq aımaqtarynda órtke qarsy qaýipsizdikti uıymdastyrý jóninde júrgizilip jatqan jumystar týraly egjeı-tegjeıli baıandaldy. Sondaı-aq órt sóndirý bólimderiniń jańa pýnktteri men olardyń jabdyqtalý deńgeıi tanystyryldy. Depýtat sonymen qatar Qaraǵandy oblysy ákimdigi janyndaǵy aýmaqtyq qorǵanys jónindegi áskerı bólimde de boldy. Sergeı Ershov áskerdiń ornalasqan jerin kórip, áskerı qyzmetshilermen áńgimelesti jáne osy bólimniń qyzmetimen tanysty.
***
Qazaqstan Respýblıkasy Parlamenti Senatynyń depýtattary Janbolat Jórgenbaev, Gennadıı Shıpovskıh jáne Zakırjan Kýzıev Almaty oblysynda boldy. Depýtattar Qonaev qalasyna sapar barysynda sýarý júıesin jańǵyrtý jónindegi qurylys jumystarynyń barysymen tanysyp, sý paıdalanýshy sharýashylyqtardyń ókilderimen kezdesti. Sý paıdalaný sharýashylyqtarynyń ókilderimen kezdesý barysynda senatorlar sýmen jabdyqtaýǵa, sý jınaý qurylystaryndaǵy sanıtarlyq-qorǵaý aımaqtaryn kútip ustaýǵa, sý sharýashylyǵy obektilerin tazalaýǵa jáne kúrdeli jóndeýge baılanysty ózekti máselelerdi talqylady. Senatorlar Іle aýdanynda Qaraoı aýyldyq okrýgine tıesili «Shala» jáne «Quralas» arnalarynyń jaı-kúıimen jáne Aşybulaq aýyldyq okrýgindegi tazartý qurylysynyń barysymen tanysyp, sý paıdalaný sharýashylyqtarynyń ókilderimen kezdesti.
***
Qazaqstan Respýblıkasy Parlamenti Senatynyń depýtattary Álı Bektaev pen Murat Qadyrbek óńirge sapar barysynda Saýran jáne Otyrar aýdandarynda boldy. Turǵyndarmen kezdesýde qubyrmen keletin sýdyń joqtyǵy, kópsalaly aýrýhana salý qajettigi, aýyldyq okrýgterde jer qoınaýyn zańsyz paıdalaný jáne basqa da mańyzdy máseleler kóterildi. Depýtat Álı Bektaev barlyq aıtylǵan usynystarǵa jeke toqtalyp, senatorlar aldaǵy sessııa barysynda osy máselelerdi sheshýge yqpal etetinin atap ótti. Senatorlar Otyrar aýdanynyń Talapty eldi mekenindegi saılaýshylarmen kezdesýde VIII shaqyrylymnyń birinshi sessııasy barysynda Senat maquldaǵan zań shyǵarý qyzmeti men zańdar týraly egjeı-tegjeıli habardar etti.Depýtattar kezdesýlerdi qorytyndylaı kelip, usynylǵan árbir usynystyń mańyzyna toqtaldy jáne olardyń kezeń-kezeńimen sheshilýine yqpal etetinin jetkizdi.
