Senatorlardy shalǵaı aýyldardaǵy ınternettiń sapasy alańdatyp otyr

ASTANA. KAZINFORM – Búgin Parlament Senatynda aýyldyq aımaqtardaǵy ınternetke qoljetimdilik máselesi talqylandy.

Internet aýyldarda bar. Biraq kóbine qajet paraqshalar ashylmaıdy, kerekti qujattar júktelmeıdi. Turǵyndar onlaın qyzmetti emes, sıgnal ustasa qýanatyn kún keship otyr.

Іri baılanys operatorlary magıstraldyq jelini shalǵaı óńirlerge deıin jetkizgen. Alaıda bul jelini ár úıge qosý -jergilikti shaǵyn provaıderlerdiń mindeti. Al olardyń aıtýynsha, kóterme tarıf tym joǵary, al jeke ınvestıtsııa salýǵa táýekel etetinder az. Memlekettik qoldaý bolmasa, bul jumysty jalǵastyrý ekonomıkalyq turǵydan tıimsiz. Sondyqtan sala ókilderi naqty qarjylaı yntalandyrý tetikterin qarastyrýdy suraıdy.

- Másele mynada, memlekettik-jekemenshik áriptestik aıasynda iri operatorlar optıka tartty. Biraq kishi provaıderlerge ne qoljetimsiz baǵa qoıady, ne múlde ruqsat bermeıdi. Bundaı jaǵdaıda aýylda jumys isteýdi ekonomıkalyq turǵyda tıimsiz etedi, - deıdi Qazaqstan baılanys operatorlary qaýymdastyǵynyń prezıdenti Oleg Emelıanov.

Baılanystan bólek, telehabar taratýda da másele shash etekten. Shekaraǵa jaqyn ornalasqan aýyldardyń kóbinde otandyq telearnalar múlde kórspeıdi. Jerigilikti halyq reseılik, ózbek nemese qytaı arnalaryn kórýge májbúr. Mundaı jaǵdaı kórermenniń aqparattyq keńistikten alystap, otandyq kontentten tysqary qalýyna ákeledi. Sondyqtan bul salada da tehnıkalyq qamtýdy qaıta qarap, naqty sharalar qabyldaý qajet, deıdi depýtattar.

– Oljas Qydyrbekuly, sizder jassyzdar. Mundaı máselege «bizge qatysy joq» dep qaraýǵa bolmaıdy. Bir úkimette otyrsyzdar! Bul – eldiń aqparattyq qaýipsizdigine tikeleı qatysty. Shekaralyq aýyldarda qazaqstandyq arnalar kórsetpeı, tek ózge elderdiń arnalary kórsetse – bul úlken másele. Sony sizder kóterýlerińiz kerek! – dedi santor Álı Bektaev.

Qoldanystaǵy zańnama teleónimderdiń tili men mazmunyna belgili bir talaptar qoıady. Biraq sheteldik arnalardyń baqylaýsyz taralýy bul talaptardyń saqtalýyna kedergi keltirip otyr. Sonymen qatar, elge telehabar taratýǵa arnalǵan sheteldik qurylǵylar lıtsenzııasyz enip jatyr eken. Bul óz kezeginde tehnıkalyq qaýipsizdikti álsiretip, otandyq naryqty básekesiz qaldyrýy múmkin. Sondyqtan másele jaqyn arada kún tártibinen túspek emes.

Osyǵan deıin Tsıfrlyq damý, ınnovatsııalar jáne aeroǵarysh ónerkásibi mınıstrligi men «Qazaqtelekom» AQ 3000-nan astam aýyldy ınternetke qosý týraly ınvestıtsııalyq kelisim jasasqany týraly jazdyq.