Senatorlar jyl basynan beri 170 saýal joldasa, onyń 130-y Úkimet basshysyna arnaldy
ASTANA. Jeltoqsannyń 28-i. QazAqparat /Qanat Mámetqazyuly/ - Senatorlar jyl basynan beri 170-ke tarta depýtattyq saýal joldasa, onyń 130-y Úkimet basshysyna arnaldy. Búgin aǵymdaǵy jyl ishinde Parlament Senatynyń atqarǵan jumystaryn qorytyndylaýǵa arnalǵan baspasóz máslıhatynda Senat apparatynyń basshysy Murat Nurtileýov osylaı málim etti,
dep habarlaıdy QazAqparat.
«Jyl basynan beri ártúrli ózekti máseleler boıynsha Senat depýtattary Úkimet basshysynyń, basqa da memlekettik organ basshylarynyń atyna 170-ke tarta depýtattyq saýal joldady. Bundaı depýtattyq saýaldardyń basym bóligi, atap aıtqanda 170 saýaldyń 130-y QR Premer-Mınıstrine baǵyttalypty», dedi M. Nurtileýov.
Sonymen qatar, joǵary palata aǵymdaǵy jyly Senattyń derbes ári erekshe qaraýyna jatatyn birshama máseleler boıynsha da sheshim shyǵarǵan. Atap aıtqanda, Senattyń kelisim berýimen QR Prezıdenti QR Bas prokýroryn jáne Ulttyq qaýipsizdik komıtetiniń tóraǵasyn taǵaıyndady. Budan basqa, Memleket basshysynyń usynysy boıynsha Parlament Senaty QR Joǵarǵy Sotynyń Tóraǵasyn, Joǵarǵy Sot sýdıalaryn saılady.
«Jergilikti ýákiletti organmen aradaǵy jumystar da jemisti túrde jalǵasýda. Bul rette Soltústik Qazaqstan, Pavlodar oblystaryna kóshpeli otyrystar uıymdastyryldy. Bundaı jıyndarda negizinen máslıhattardaǵy depýtattyq ókilettikterdiń júzege asyrylý barysy týraly máseleler talqylandy», dedi M. Nurtileýov.
