Senatorlar Joldaýdan týyndaıtyn mindetterdi júzege asyrý joldaryn talqylady
Spıker bıylǵy Joldaýda áleýmettik salaǵa basa mán berilgenin atap ótti.
«Memleket basshysynyń bastamasymen kelesi jyldan bastap eń tómengi jalaqy mólsheri ulǵaıady. Bul sheshim mıllıonnan astam qazaqstandyqtyń ál-aýqatyn arttyrýǵa múmkindik beretini sózsiz. Sondaı-aq, 2025 jylǵa deıin bıýdjet qyzmetkerleriniń jalaqysy jyl saıyn 20 paıyzǵa ósip otyrady. Bul shara mádenıet qyzmetkerlerin, muraǵatshylardy, qoryqshylardy jáne bıýdjet salasyndaǵy ózge de mamandardy qamtıdy», – dedi Máýlen Áshimbaev.
Senat Tóraǵasy Memleket basshysynyń tapsyrmalary azamattardy alańdatqan ózekti máselelerdi sheshýge arnalǵanyn atap ótti. Bul tapsyrmalar aýyz sý, turǵyn úı, jaıylymdyq jer, densaýlyq saqtaý, bilim berý jáne bıznes júıelerin qoldaý sııaqty basymdyqtardy qamtıdy. Munyń bári mańyzdy zańnamalyq ózgeristerdi qajet etetini belgili.
«Jyl sońyna deıin ulttyq qordy jáne bıýdjetti tıimdi paıdalanýdy kózdeıtin qosymsha zańnamalyq túzetýlerdi qabyldaýymyz kerek. Sonymen qatar, ǵylym salasyn odan ári damytý men qoldaýǵa, aktıvterdi tıimdi paıdalanýǵa, aglomeratsııany damytýǵa arnalǵan zańnamalyq sheshimder qabyldanady», – dedi Máýlen Áshimbaev.
Sonymen qatar ol aldaǵy ýaqytta Senat Joldaýda belgilengen basymdyqtardy zańnamalyq turǵydan qamtamasyz etý úshin júıeli ári keshendi jumys júrgizetinin aıtty. Soǵan baılanysty Palata depýtattary sarapshylar qaýymdastyǵymen, qoǵamdyq ınstıtýttarmen jáne basqa da múddeles taraptarmen birlesip, bilsendi jumys isteýdi kózdep otyr. Bul el Prezıdenti jarııalaǵan reformalardy tabysty iske asyrý úshin asa mańyzdy.
«Jańa reformalardyń basty maqsaty – azamattardyń ortalyq jáne jergilikti deńgeıdegi sheshim qabyldaý protsesterine qatysýyn qamtamasyz etý. Osy baǵytta Memleket basshysy depýtattyq mandattardy bólý kezinde erekshe qajettiligi bar azamattar úshin arnaıy kvota qarastyrý qajet ekenin aıtty. Jalpy, bıylǵy Joldaýdy qoǵamnyń aldaǵy reformalar boıynsha suraqtaryna berilgen naqty jaýap dep qabyldaımyz», – dedi Senat Tóraǵasy.
Odan bólek, Máýlen Áshimbaev senatorlardyń parlamenttik kanıkýl kezinde óńirlerde ótkizgen kezdesýleri men atqarǵan jumystaryna nazar aýdardy.
«Sizder parlamenttik kanıkýl kezińde óńirlerde bolyp, halyqpen, qoǵamnyń bedeldi ókilderimen jáne jergilikti bılikpen kezdesýler ótkizdińizder. Sol kezdesýlerde kóterilgen máseleler de Palatanyń aldaǵy jumysynda eskerilýi qajet», – dedi Máýlen Áshimbaev.
Jańa sessııanyń alǵashqy otyrysynda Senat depýtattary Qazaqstan Respýblıkasynyń «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýyna baılanysty oǵan ózgerister engizý týraly hattamany ratıfıkatsııalaý týraly» zań jobasyn qarap, qabyldady.
«Qabyldanǵan ózgerister Eýrazııalyq ekonomıkalyq odaqqa múshe memleketter arasynda elektr energııasyn jetkizýdiń jekelegen máselelerin sheshýge arnalǵan. Aldaǵy ýaqytta bul túzetýler Uıym aıasynda elektr energetıkasy júıesin tıimdi paıdalanýǵa oń septigin tıgizedi dep senemiz», – dedi Máýlen Áshimbaev.
Sondaı-aq, otyrys barysynda senatorlar birqatar depýtattyq saýal joldady. Álı Bektaev aýyl sharýashylyǵy maqsatyndaǵy jerlerdiń tapshylyǵyna nazar aýdarsa, Baqtybaı Shelpekov Beıneý-Shalqar avtojolynyń qurylysyna qatysty máseleni kóterdi. Senatorlar Asqar Shákirov pen Lázzat Súleımen turǵyn úı máselesine qatysty saýal joldady. Al Dana Nurjigitova mektep psıhologtaryn daıarlaý jumysyndaǵy olqylyqtarǵa alańdaýshylyq bildirdi. Álimjan Qurtaev ejelgi Otyrar qalasyn jandandyrý jumystaryna kóńil bólý kerektigin aıtty.
Budan basqa, Palata otyrysynda Senat depýtattary bir kúndik jalaqylaryn Jambyl oblysyndaǵy jarylys saldarynan zardap shekkenderdi qoldaýǵa arnalǵan qorǵa aýdarý týraly sheshim qabyldady.
