Senatorlar: Jetisý oblysynyń sý sharýashylyǵy erekshe nazar aýdarýdy talap etedi

TALDYQORǴAN. QazAqparat – Parlament Senatynyń depýtattary Ǵalıasqar Sarybaev pen Amangeldi Tolamısov Jetisý oblysyna sapary barysynda sý sharýashylyǵynyń strategııalyq mańyzdy nysandarynda, onyń ishinde Tentek sý qoımasy men Qaratal ózenindegi bóget aýmaǵynda boldy, dep habarlaıdy QazAqparat Palatanyń baspasóz qyzmetine silteme jasap.

Oblystaǵy aýyl eńbekkerlerin sýarmaly sýmen qamtamasyz etýdegi negizgi jumysty «Qazsýshar» AQ Almaty fılıalynyń qaramaǵyndaǵy osy nysandar atqaryp keledi. Alaıda, qazirgi ýaqytta bul nysandarǵa kúrdeli jóndeý júrgizý qajet bolyp otyr.

Depýtattar osyǵan deıin depýtattyq saýaldarynda sýmen qamtamasyz etý jónindegi problemalyq máselelerdi kótergen bolatyn. Onyń nátıjesi boıynsha ýákiletti organdar Tentek jáne Aqeshki sý toraptarynyń qaýipsizdik deklaratsııasyn ázirleý úshin memlekettik bıýdjetten 21,8 mln teńge bólý jóninde shara qabyldady. Sondaı-aq, Almaly, Aşybulaq sý qoımalaryna kóp faktorly tekserý júrgizý jáne Kúrti sý qoımasynyń qaýipsizdik deklaratsııasyn ázirleý úshin 2024-2026 jyldarǵa arnalǵan bıýdjetten qarjy bólýge ótinim ázirlendi.

Senatorlar sonymen qatar, Qyzylaǵash bógetinde kúrdeli jóndeý aıaqtalǵannan keıin osy nysanda synaq jumystaryn júrgizý barysymen tanysty.