Senatorlar «Jer qoınaýy jáne jer qoınaýyn paıdalaný týraly» zań jobasyn Májiliske qaıtardy
ASTANA. Sáýirdiń 21-i. QazAqparat /Aıdar Ospanalıev/ - Búgin Parlament Senatynyń jalpy otyrysynda senatorlar «Jer qoınaýy jáne jer qoınaýyn paıdalaný týraly» zań jobasyn qarap,
ony Májiliske qaıtardy, dep habarlaıdy QazAqparat.
Otyrys barysynda atalmysh qujatqa qatysty baıandamany Munaı jáne gaz mınıstri Saýat Myńbaev jasaǵan bolatyn. Onyń sózine qaraǵanda, zań jobasy jer qoınaýyn paıdalaný salasyndaǵy qatynastardy jetildirýge baǵyttalǵan. «Qazirgi qoldanystaǵy
zań 1996 jyly qabyldanǵan. Sodan beri birshama ýaqyt ótti. Qoldanystaǵy zańǵa keıingi ýaqyttary birshama ózgerister engizilgenimen onda birtalaı kemshilikter bar. Jańa zańnyń qajettigin biz jumys barysynda uǵyndyq», dedi mınıstri.
Onyń sózine qaraǵanda, zań jobasy jer qoınaýyn paıdalaný jónindegi operatsııalardy júrgizýde ınvestıtsııalar tartý úshin qolaıly jaǵdaılar jasaıdy. Sonymen qatar respýblıkalyq jáne óńirlik múddelerdi ushtastyryp, mıneraldyq-shıkizattyq bazany tolyqtyrýǵa múmkindik beredi. Buǵan qosa qujat memlekettiń basym quqyǵyn júzege asyratyn vedomstvoaralyq komıssııanyń, sondaı-aq elimizdegi jer qoınaýyn paıdalaný, quqyq berýmen baılanysty komıssııalardyń qyzmetin egjeı-tegjeıli reglamentteıdi.
