Senatorlar «jasyl» ınvestıtsııany damytý máselesin talqylady
ASTANA. KAZINFORM – Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary QR Ekologııa jáne tabıǵı resýrstar mınıstrliginiń basshylyǵymen kezdesti.
Memlekettiń «jasyl» ınvestıtsııany tartýdy kótermeleý men yntalandyrý jáne eń úzdik qoljetimdi tehnıkany keńinen qoldaný aıasynda elimizdegi Ekologııalyq kodeksti iske asyrý kún tártibindegi basty másele boldy. Komıtet tóraǵasy Álı Bektaev Ekologııalyq kodekstiń 2021 jyly qabyldanǵanyn atap ótti. Bul baǵytta birneshe jyl boıy aýqymdy ister atqaryldy. Sonyń nátıjesinde qujatta úzdik halyqaralyq tájirıbege negizdelgen strategııalyq erejeler toptamasy bekitildi.
«Ekologııalyq kodekstiń negizgi maqsatynyń biri - qorshaǵan ortaǵa teris áserdi azaıtý bolyp otyr. Ol úshin ónerkásiptik kásiporyndardy tehnıkalyq jaǵynan jańǵyrtý kózdelgen bolatyn. Solardyń biri - eń jaqsy qoljetimdi tehnıkany birte-birte engizý jáne jasyl ınvestıtsııalardy qoldaý tásilderi qarastyrylǵan. Kodekste bul normalardyń iske asyrylýy kezeń-kezeńmen bekitilgen», - dedi Álı Bektaev.
Ekologııa jáne tabıǵı resýrstar mınıstriniń orynbasary Mansur Oshýrbaev óz kezeginde Ekologııalyq kodeks qazirgi zamanǵy ekologııalyq saıasat baǵytyndaǵy mańyzdy qadam bolyp tabylatynyn jáne qorshaǵan ortanyń jaı-kúıin jaqsartý men ekologııalyq tepe-teńdikti saqtaýǵa umtylystyń ajyramas bóligi retinde jasyl tehnologııany engizý tetikterin kózdeıtinin atap ótti. Qorshaǵan ortaǵa teris áserdi azaıtý men ekologııalyq jaǵdaıdy jaqsartýdyń tıimdi quraly – eń jaqsy qoljetimdi tehnologııany engizý ustanymy.
Іs-sharaǵa sonymen qatar ekologııa, ónerkásip jáne qurylys, ulttyq ekonomıka, saýda jáne ıntegratsııa mınıstrlikteriniń, Memlekettik kirister komıtetiniń basshylyǵy, sondaı-aq Qazaqstannyń Damý Bankiniń, ǵylymı-zertteý ınstıtýttarynyń ókilderi jáne osy salanyń sarapshylary qatysty.
