Senatorlar zeınetaqy jınaqtarynyń bir bóligin paıdalaný sharttaryn talqylady
Prezıdent Qasym-Jomart Toqaev Qazaqstan halqyna Joldaýynda Úkimetke Ulttyq bankpen birlese otyryp, bıylǵy jyldyń sońyna deıin salymshylardyń zeınetaqy jınaqtarynyń bir bóligin paıdalanýyna qatysty barlyq qajetti normatıvtik-quqyqtyq aktilerdi qabyldaýdy jáne daıyndyq jumystaryn júrgizýdi tapsyrǵan bolatyn.
Senattyń Qarjy jáne bıýdjet komıtetiniń tóraǵasy Olga Perepechınanyń aıtýynsha, bul másele ásirese pandemııadan ótip, el ekonomıkasy baıaýlaǵan kezde asa mańyzdy ári ótkir bolyp otyr.
Depýtattar bul jańalyqtar otandyq ekonomıkaǵa, onyń ishinde ınflıatsııaǵa qalaı áser etetini, zeınetaqy jınaqtaryn maqsatsyz paıdalaný nemese shetelge áketý qaýpi qandaı ekendigine de nazar aýdardy.
Otyrys barysynda zeınetaqy jınaqtarynyń bir bóligin turǵyn úı jaǵdaılaryn jaqsartýǵa, emdelýge, jeke basqarýshy kompanııalarǵa berýge arnalǵan sharttarǵa qatysty kóptegen suraqtar qoıyldy.
Senatorlardy zeınetaqymen qamtamasyz etý jónindegi kepildikterdi saqtaý jáne osy saladaǵy halyqaralyq tájirıbe erekshe qyzyqtyrdy.
«Meniń oıymsha, zeınetaqy jınaǵynyń bir bóligin paıdalaný máselesinde azamattarymyzdyń saýattylyǵyn arttyrý – mańyzdy. Azamattarymyz alaıaqtyq shemalarǵa tartylyp ketpesi úshin biz qazir zeınetaqy aktıvterin senimgerlik basqarýǵa berýdi qaraıtyn bolamyz. Sondyqtan bul másele muqııat pysyqtalýy kerek. Bizdiń azamattar ózderiniń jınaqtaryn kimge beretinin jáne onyń bolashaqtaǵy qaýpi qandaı ekenin túsinýi tıis», - dedi depýtat Nurlan Qylyshbaev.
Memlekettik organdardyń ókilderi salymshylardyń óz zeınetaqy jınaqtaryn paıdalana alatyn sharttar men maqsattaryn egjeı-tegjeıli aıtyp berdi.
Málim etilgendeı, zeınetaqy jınaqtarynyń bir bóligin paıdalaný - turǵyn úı máselelerin sheshýge jáne azamattardyń densaýlyǵyn jaqsartýǵa, formaldy jumyspen qamtýdy yntalandyrýǵa, medıtsınalyq qymbat qyzmetterdiń jekelegen túrlerine qoljetimdilikti qamtamasyz etýge, halyqtyń senimi men jınaqtaýshy zeınetaqy júıesiniń tartymdylyǵyn arttyrýǵa yqpal etedi dep kútiledi.
«Talqylaý nátıjesinde kezdesýge qatysýshylar azamattarǵa qyzmet kórsetýdiń qoljetimdiligi men jedeldigin arttyrý jóninde ýákiletti memlekettik organdarǵa usynymdar ázirledi. Sondaı-aq, zeınetaqy júıesi sýbektileri arasynda barynsha qaǵazsyz qujat aınalymyn, qyzmetterdi tsıfrlandyrýdy, derektermen elektrondyq almasýdy qamtamasyz etý boıynsha jumysty jalǵastyrý usynyldy. Odan basqa, usynymdar ýákiletti ınstıtýttardy aıqyndaýǵa jáne zeınetaqy jınaqtaryn jeke qarjy kompanııalarynyń basqarýyna berý tetiginiń keıbir sharttary men talaptaryn jumsartýǵa qaraı qaıta qaraýǵa qatysty boldy.
Otyrysqa ýákiletti memlekettik organdardyń, Qazaqstan qarjygerleri qaýymdastyǵynyń jáne BJZQ ókilderi qatysty», - dedi Senattan.
