Senatorlar zań jobasynda terrorızmge qarsy operatsııaǵa qatysatyn adamdardyń múmkindigin keńeıtti
ASTANA. Jeltoqsannyń 24-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «QR keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylady.
Májilis maquldaǵan zań jobasyna Senat tarapy ózgerister engizip, qujatty keri qaıtardy, dep habarlaıdy QazAqparat.
Atalǵan zań jobasy 2007-2011 jyldarǵa arnalǵan Ulttyq qaýipsizdik strategııasy erejelerin oryndaý maqsatynda ázirlengen. Zań jobasy buryn terrorıstik qylmys jasaǵan adamdarǵa eskirý merzimderin qoldanýǵa tyıym salýǵa, ekstremıstik nemese terrorıstik uıymnyń óz ataýyn ózgertý faktisin sottyń anyqtaý tetigin bekitýge baǵyttalǵan. Sonymen birge qujatta BAQ-tarda terrorızmge qarsy operatsııalardyń tehnıkalyq tásilderi men taktıkasyn ashatyn málimetterdi taratýdy shekteýge, lańkestikke qarsy operatsııanyń quqyqtyq tártibin retteýdi jetildirýge baǵyttalǵan sharalar kózdeledi. Budan basqa, jobada qamtylǵan ózgertýlerdiń bir parasy áli bolmaǵan terrorıstik qaýipterdiń aldyn alýǵa qatysty bolyp tabylady.
Ekinshi oqylym barysynda zań jobasyna birqatar ózgerister jasaldy. Máselen, senatorlar sheteldik nemese halyqaralyq uıymdy ekstremıstik nemese terrorıstik dep taný týraly is júrgizý sheńberinde sottyń osyndaı uıymdardyń ataýlaryn ózgertý faktisin anyqtaý tártibin qarastyrý sharalaryn usyndy. Budan basqa, terrorızmge qarsy operatsııaǵa qatysatyn adamdardyń múmkindikterin negizsiz taryltýdy boldyrmaý maqsatynda azamattardyń turǵyn úı-jaılaryna terrorısterdiń izine túsken kezde ǵana kirýge bolady degen qaǵıdany alyp tastaý qarastyryldy. Bul rette zańnamaǵa sáıkes keltirý úshin eger ondaı kirý adamdardyń ómiri men densaýlyǵyna naqty qaýip tóndirýi múmkin bolǵanda, osy is-qımyldyń sharty retinde jol beriletindigin bekitý qamtyldy. Sondaı-aq júrgizilgen is-qımyldardyń zańdylyǵyn tekserý úshin turǵyn úıge kirý faktileri týraly habarlamany 24 saǵat ishinde prokýrorǵa jiberý týraly norma tolyqtyryldy.
Zań jobasy Parlament Májilisine qaıtaryldy.
