Senatorlar Venetsııa komıssııasynyń «Adam quqyqtary jónindegi ýákil týraly» zań jobasy boıynsha usynymdaryn talqylady

NUR-SULTAN. QazAqparat - Senatorlar Asqar Shákirov, Muhtar Qul-Muhammed jáne Qaırat Qojamjarov Eýropa Keńesindegi Venetsııa komıssııasynyń otyrysyna qatysty. Onda «Qazaqstan Respýblıkasyndaǵy Adam quqyqtary jónindegi ýákil týraly» zań jobasy talqylandy, dep habarlaıdy QazAqparat palatanyń baspasóz qyzmetine silteme jasap.

«Venetsııa Komıssııasy retinde kóbirek tanymal, demokratııaǵa quqyq arqyly qadam basqan Eýropalyq Komıssııa onyń qyzmetine qatysatyn memleketterge konstıtýtsııalyq jáne quqyqtyq kómek kórsetetin táýelsiz konsýltatıvtik organ. Qazaqstan Respýblıkasy komıssııaǵa 2012 jyldan bastap múshe bolyp keledi.

Komıssııa músheleri Ombýdsmen ınstıtýtynyń zańnamalyq bekitilýin qoldaı otyryp jalpy alǵanda onyń zań jobasyndaǵy táýelsiz mártebesi men qyzmetin júzege asyrý barysynda zań ústemdigi qaǵıdasynyń belgilenýin joǵary baǵalady», - delingen palata málimetinde.

Sondaı-aq qujattyń mazmundyq bóligi boıynsha jeke tilekter aıtylǵan, ol ózara kelisim boıynsha odan ári ımplementatsııalaý barysynda iske asatyn bolady.

«Qazaqstan Parlamenti Venetsııa komıssııasymen yntymaqtastyqty joǵary baǵalaıdy jáne bizdiń zań jobamyzdyń jan-jaqty, obektıvti qaralǵany jáne ol boıynsha syndarly ári paıdaly usynymdar berilgeni úshin oǵan alǵys bildiredi. Prezıdent Qasym-Jomart Toqaevtyń bastamasy boıynsha Qazaqstanda jan-jaqty reformalar júrip jatqanda bul usynystardy júzege asyrý joldary tabylatyn bolady», - dep atap ótti Senat Tóraǵasynyń orynbasary Asqar Shákirov óz sózinde.

Qaralǵan zań jobasy boıynsha otyrys sońynda tıisti qorytyndy qabyldandy.

Komıssııa sonymen qatar Ombýdsmen ınstıtýty jónindegi Kishi komıssııanyń vıtse-prezıdenti etip Qazaqstan Respýblıkasynan komıssııa múshesi, Qazaqstan Respýblıkasy Prezıdentiniń janyndaǵy Adam quqyqtary jónindegi komıssııanyń tóraǵasy Igor Rogovty saılaý týraly sheshim qabyldady.

«Qazaqstan Respýblıkasyndaǵy Adam quqyqtary jónindegi ýákil týraly» zań jobasy Memleket basshysynyń Qazaqstan Respýblıkasy Parlamentiniń VII shaqyrylymdaǵy birinshi sessııasynyń ashylýynda aıtqan tapsyrmasyna sáıkes ázirlengen bolatyn.

Bir top Parlament depýtattary osy tapsyrmany oryndaý maqsatynda zań jobasyn ázirleý týraly bastama kóterdi, oǵan memlekettik organdardyń, halyqaralyq uıymdardyń jáne azamattyq qoǵamnyń aýqymdy ókilderi qatysty.