Senatorlar ýran óndirý máseleleri týraly zań jobasyn qarady
NUR-SULTAN. QazAqparat - Búgin Senattyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysy boldy. Onda depýtattar ýran óndirý máseleleri boıynsha «Jer qoınaýy jáne jer qoınaýyn paıdalaný týraly» Qazaqstan Respýblıkasynyń Kodeksine ýran óndirý máseleleri boıynsha ózgerister men tolyqtyrýlar engizý týraly» zań jobasyn talqylady. Bul týraly QazAqparat Senattyń baspasóz qyzmetine silteme jaap habarlaıdy.
Zań jobasyn qabyldaý ýran óndirý barysynda kelisimshart aýmaǵynda ónim óndirý kezeńin uzartý sharttary men rásimderin retteýge jáne jete barlaý júrgizýge múmkindik beredi. Qujatqa sáıkes ýran óndirýdi retteıtin birqatar erejeler engiziledi. Sondaı-aq, zań jobasyndaǵy jańa ereje ýran óndirý zardaptaryn joıý jobasyn qosymsha engize otyryp, ýran óndirýdegi negizgi jobalaý qujattarynyń tizbesin keńeıtýge qatysty bolyp otyr.
«Jer qoınaýy jáne jer qoınaýyn paıdalaný týraly» kodekske túzetýler qabyldanǵanda kásiporyndarǵa ýran óndirý kólemi men kelisimshart talaptary jáne barlyq mindetti aýdarymdardy tóleý saqtalady dep boljanyp otyr. Sondaı-aq, ol ýran qory boıynsha da, ony óndirý boıynsha da Qazaqstan jetekshi oryn alatyn salany retteýdegi olqylyqtardy joıýǵa jáne ony damytý úshin jaǵdaıdy jaqsartýǵa múmkindik beredi», - dedi komıtet tóraǵasy Dáýren Ádilbekov.
Senator Baýyrjan Qanıev zań jobasynyń erejeleri ýran salasyn damytýǵa jańa serpin berip, bıýdjetke salyq túsimderin arttyrýǵa, sondaı-aq eldiń ınvestıtsııalyq saıasatyna degen senimdi arttyrýǵa múmkindik beretinin atap ótti.
