Senatorlar Ulttyq Ulan men Shekara qyzmetin qarjylandyrý máselesin kóterdi
ASTANA. QazAqparat - Parlament Senatynyń jalpy otyrysynda birneshe depýtattyń QR Úkimet basshysy Baqytjan Saǵyntaevtyń atyna joldaǵan saýalynda Ulttyq Ulan, Shekera qyzmetin qarjylandyrý salasyndaǵy másele kóterildi, dep habarlaıdy QazAqparat.
«Ústimizdegi jyldyń qarashasynda QR Qorǵanys mınıstrliginde Parlament Senatynyń Halyqaralyq qatynastar, qorǵanys jáne qaýipsizdik komıtetiniń kóshpeli otyrysy ótken bolatyn. Onyń barysynda Áskerı doktrına, Tujyrymdama, Qarýly Kúshterdiń jáne Qazaqstan Respýblıkasynyń basqa áskerı jasaqtarynyń qurylý Jospary men damýy talqylandy. Talqylaý barysynda, sharaǵa qatysýshylar Qarýly Kúshterdiń jáne Qazaqstan Respýblıkasynyń basqa áskerı jasaqtary jabdyqtalýynyń biryńǵaı úrdisin daıarlaý kerektigin aıtty. Zańnamalyq turǵyda osy salada sońǵy jyldary kóp máseleler óz sheshimin tapqanyn atap ótý kerek. Sonyń ishinde, jalpy áskerı azyq mólsheri belgilenip, kelesi jyldan bastap arnaýly baspanalyq tólemtetigi arqyly barlyq áskerı qyzmetkerlerdi turǵyn úımen qamtýdyń jańa modeli engiziledi», - dep toqtaldy senator Nurjan Nursıpatov.
«Biraq qazirgi tańda Ulttyq Ulan, Shekara qyzmeti, azamattyq qorǵaý qyzmetteri basqa memlekettik organdardyń quramynda bolǵandyqtan, Qarýly Kúshterdiń qarjylyq júıesinen tys qalyp otyr. Óıtkeni Qazaqstan Respýblıkasynyń qoldanystaǵy zańnamasynda osy qurylymdar basqa áskerı quramalardyń qatarynda bolyp esepteledi, sol sebepti olardyń qajettilikteri júıeli túrde qarjy jetispeýshiligine dýshar bolyp otyr», - deıdi depýtat.
Osyǵan oraı qoǵamdyq tártipti kúsheıtý, ulttyq qaýipsizdikti qamtamasyz etý, terrorlyq aktilerdiń aldyn alý, anyqtaý jáne boldyrmaý jumysynyń tıimdi júıesin damytý maqsatynda tıisti sharalar usynyldy. Birinshiden, bıýdjettik kodekske Ulttyq Ulan, Shekara qyzmeti, azamattyq qorǵaý qyzmetteri qarjylandyrýynyń derbes shyǵyn lımıtin qarastyratyn ózgertý men tolyqtyrýlar engizý eskerilgen. Ekinshiden, Qarýly Kúshterdiń jáne Qazaqstan Respýblıkasynyń basqa áskerı jasaqtaryn qarjylandyrý jalpy ishki ónimiń 1 paıyzynan kem bolmaýyn zańnamalyq deńgeıde mindetteý usynyldy.
«Bul sharalar tek qana Qarýly Kúshter emes, sonymen birge Ulttyq Ulan jáne Shekara qyzmetiniń qarjylyq, materıaldyq- tehnıkalyq qajettilikteriniń kepildi oryndalýyn qamtamasyz etedi», - dep túsindirdi N. Nursıpatov.
