Senatorlar Ulttyq neırohırýrgııa ortalyǵynyń jumysymen tanysty
ASTANA. QazAqparat - Parlament Senaty Áleýmettik-mádenı damý jáne ǵylym komıtetiniń tóraıymy Birǵanym Áıtimova bastaǵan komıtet músheleri «Ulttyq neırohırýrgııa ortalyǵy» aktsıonerlik qoǵamynda boldy.
Kezdesýdi asha kelip, Senattyń Áleýmettik-mádenı damý jáne ǵylym komıtetiniń tóraıymy Birǵanym Áıtimova Qazaqstan Respýblıkasynyń Prezıdenti Nursultan Nazarbaev jarııa etken «5 ınstıtýttyq reformany iske asyrý jónindegi 100 naqty qadam» Ult josparyn júzege asyrýda Parlament qajetti zańnamalyq baza qalyptastyrǵanyn atap ótti.
B.Áıtimova sondaı-aq Parlament aldynda Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýyndaǵy barlyq basymdyqtardy iske asyrý aıasynda aýqymdy ári jaýapty jumystar turǵanyn atap ótti.
Senator syrqattarǵa joǵary bilikti neırohırýrgııalyq kómek kórsetýdegi Ortalyqtyń eleýli úlesine toqtaldy, sondaı-aq komıtet músheleriniń osy sapary mindetti áleýmettik medıtsınalyq saqtandyrýdyń jańa úligisin engizýdiń qarsańynda densaýlyq saqtaý salasyndaǵy mekemelerdi tanystyrý sharalarynyń bir bóligi ekenin aıtty. Buryn komıtet Áleýmettik medıtsınalyq saqtandyrý qorynyń basshylyǵymen kezdesý uıymdastyrǵan bolatyn.
Kezdesý barysynda «Ulttyq neırohırýrgııa ortalyǵy» aktsıonerlik qoǵamy basqarmasynyń tóraǵasy Serik Aqsholaqov Ortalyqtyń jumysymen tanystyrdy. Depýtattar balalar neırohırýrgııasy, reanımatsııa jáne ıntensıvtik emdeý, ortalyq júıke júıesiniń patologııasy, gospıtaldyq farmatsııa, antıografııalyq operatsııa bólimderinde, sondaı-aq trenıng ortalyǵynda boldy.
Kezdesý barysynda senatorlar densaýlyq saqtaý salasynyń aldynda turǵan jekelegen máselelerge toqtalyp, pikir almasty. Senat depýtattary A.Bıjanov, Á.Bektaev jáne J.Erǵalıev óz oılaryn ortaǵa saldy.
Júzdesýdi qorytyndylaı kelip, senator Birǵanym Áıtimova kezdesýdiń mańyzdylyǵy men nátıjeli bolǵanyn atap ótti. Onyń pikirinshe, kelýshilerdiń árqaısysy zań erejelerin is júzinde oryndalýy týraly jan-jaqty habardar boldy.
