Senatorlar «Úlken otbasy» arnaıy baǵdarlamasynyń qajettigin aıtty
ASTANA. QazAqparat - Bir top Senat depýtattary kóp balaly analar men múgedekterdi qoldaýǵa baǵyttalǵan arnaıy keshendi áleýmettik baǵdarlama ázirleýdi surady. Osy oraıda olar Úkimet basshysynyń atyna depýtattyq saýal joldady, dep habarlaıdy QazAqparat.
Senator Murat Baqtııarulynyń aıtýynsha, Úkimet «Altyn alqa, Kúmis alsqasy» bar analardyń, asyraýshysy joq (ajyrasqan, jesir t.b.) analardyń, múgedek áıelderdiń, múgedek balasy bar analardyń áleýmettik-turmystyq ál-aýqatyn kóterý úshin árbir balaǵa kámelettik jasqa jetkenshe eń tómengi jalaqynyń 50 paıyz kóleminde járdemaqy tóleýdiń múmkindikterin qarastyrý qajet.
«Ekinshiden, kóptegen damyǵan elderde bar kóp balaly otbasyn qoldaý jáne járdemdesý maqsatynda «Úlken otbasy» arnaıy memlekettik baǵdarlama qabyldanýy tıis», - dedi depýtat.
Onyń sózine qaraǵanda, memlekettik ataýly áleýmettik kómekti taǵaıyndaý barysynda otbasynda birge turatyn zeınetkerdiń, múgedektiń, stýdenttiń jáne bir jasqa deıingi bala kútimine, múgedek balany qaraǵany úshin tólenetin járdemaqylar men shákirtaqy kólemin tabys kózi retinde esepke almaý kerek.
«Kóp balaly analar men turmysy tómen otbasylaryń Úkimettiń turǵyn úıimen qamtamasyz etýge baǵyttalǵan sanalýan baǵdarlamalarǵa qatysý múmkindiginiń joq bolýyna baılanysty kópshiligi turýǵa óte qolaısyz-tar, jaldamaly oryndar men páterlerde turýǵa májbúr. Sondyqtan da olardyń úı kezektiligin bólek tirkeý sharalaryn jáne olar úshin barynsha qoljetimdi aldyn-ala jarnapul tólemeı jalǵa beriletin, elimizdiń barlyq qalalary men aýdan ortalyqtarynda salatyn turǵyn úı máselesin sheshýge baǵyttalǵan júıeli is-sharalar qabyldanýy tıis», - dedi senator.
Osy oraıda, ol kóp balaly analar men múgedekterdi jáne aýyr qıyn ómirlik jaǵdaıdaǵy ómir súrip jatqan azamattarymyzdy qoldaýǵa baǵyttalǵan arnaıy keshendi áleýmettik baǵdarlama ázirleýdi surady.
