Senatorlar Úkimetke fermerlerdiń máselesin sheshý joldaryn usyndy
ASTANA. KAZINFORM - Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary aýyl sharýashylyǵy, sý resýrstary jáne ırrıgatsııa, saýda jáne ıntegratsııa mınıstrlikteriniń, sondaı-aq Túrkistan oblysy ákimdiginiń ókilderimen kezdesti.
QR Parlamenti Senaty baspaóz qyzmetiniń habarlaýynsha, kezdesýge qatysýshylar komıtettiń Túrkistan oblysynda «Ońtústik aımaqtaǵy agroónerkásiptiń jaı-kúıi: problemalary men sheshý joldary» taqyryby boıynsha ótken kóshpeli otyrysynyń qorytyndylaryn talqylady.
Onda agroónerkásip keshenin damytý jáne ózekti máselelerdi sheshý joldary talqylanǵan bolatyn.
Senatorlar kóshpeli otyrystyń qorytyndysy boıynsha anyqtalǵan problemalardy sheshý jónindegi usynymdar toptamasyn ázirledi.
Atap aıtqanda, erozııaǵa ushyraǵan jerlerdi qalpyna keltirý boıynsha jol kartasyn ázirleý, fermerlerdiń geobotanıkalyq jáne topyraq zertteýleriniń nátıjelerine qol jetkizýin qamtamasyz etý úshin aýyl sharýashylyǵy jerlerine aýdıt jáne tsıfrlandyrý júrgizý usynyldy.
Senatorlar agroónerkásip sektoryndaǵy ahýaldy jaqsartý jáne sý resýrstaryn basqarý úshin sýbsıdııalardy nysanaly paıdalanýǵa toqsan saıyn monıtorıng júrgizý, qolaıly ınvestıtsııalyq orta qurý, zamanaýı zerthanalar sanyn ulǵaıtý jáne fıtosanıtarııalyq jáne veterınarııalyq baqylaýdy kúsheıtýdi usyndy. Sondaı-aq, jylyjaılardy jylytýǵa jáne aýyl sharýashylyǵy tehnıkasyn jańartý deńgeıin arttyrýǵa arnalǵan shyǵyndar boıynsha memlekettik qoldaý sharalaryn qarastyrý usynylady.
