Senatorlar Úkimetten krıptovalıýtalardy quqyqtyq alańǵa tezirek engizýdi surady
ASTANA. QazAqparat - Parlament Senatynyń depýtattary krıptovalıýtamen saýda jasaǵan azamattardyń múliktik quqyǵy men erkindiginiń qorǵalýyn qamtamyz etý máselesin kóterdi, dep habarlaıdy «QazAqparat» HAA tilshisi.
Senator Dýlat Qusdáýletov palatanyń jalpy otyrysynda resmı túrde aqsha birligi retinde qoldanylmaıtyn krıptovalıýtalardyń aınalymyn rettep otyratyn quqyqtyq baza joqtyǵyn Premer-Mınıstr men Ulttyq bank basshysynyń esine saldy.
«Alaıda qazirgi ýaqytta krıptavalıýtalardy qoldaný boıynsha bizdiń elde aıtarlyqtaı qyzyǵýshylyq paıda boldy. Ol ınvestıtsııa sala otyryp, tezirek paıda tabý úshin qoldanylady. Tipti Qazaqstan azamattarynyń azamattyq-quqyqtyq kelisimdi krıptavalıýtalar arqyly jasaý jaǵdaıy - múlikti nemese avtokólikti, óndiristik nysandardy satý-satyp alý jaǵdaılary tirkelip otyr. Biraq, krıptavalıýtalar shynaıy aktıvtermen qamtamasyz etilmegen. Turaqty baǵasy nemese qaıtarym jaǵynan eshqandaı jaýapkershiligi joq. Sáıkesinshe, salynǵan ınvestıtsııanyń saqtalatyny týraly kepildi eshkim bermeıdi», - deıdi depýtat.
Onyń aıtýynsha, krıptavalıýtalardyń aınalymyn quqyqtyq turǵyda retteýdiń joqtyǵynan oǵan memlekettik baqylaý nemese esep júrgizilmeıdi. Al baqylanbaıtyn dúnıe el ishinde birqatar jaǵymsyz áleýmettik-ekonomıkalyq jáne quqyqtyq máselelerdi týyndatýy múmkin.
«Krıptavalıýtalar paıdalanylýyna tyıym salynǵan nysandar, qarý nemese esirtki, emdik dáriler boıynsha operatsııalarda qoldanylýy múmkin. Krıptavalıýtalardyń aınalymy qylmysqa ákep soqtyryp, ulttyq valıýtanyń bir bóligi kóleńkeli aınalymǵa jumyldyrylýy yqtımal», - deıdi depýtat.
Senatordyń málimdeýinshe, atalǵan máseleler ulttyq qaýipsizdik, qarjy júıesi úshin áleýetti qaýip týyndatyp, alaıaqtyqqa soqtyrýy múmkin. Osyǵan baılanysty depýtat jelide memlekettik kirister organdary resýrsyn qoldana otyryp, «astyrtyn maınıng» jaǵdaıy anyqtalǵanyn eske saldy.
«Qylmystyq zańnamada da osy salany qarastyrý kerek. Osyǵan baılanysty krıptovalıýtalardy qoldanýdy retteý boıynsha qabyldanatyn sheshimderdiń eń birinshi kezekte kerektigin atap ótkimiz keledi», - deıdi depýtat.
