Senatorlar telearnalar janynan olardyń jumysyn baǵyttap, retteýmen aınalysatyn qoǵamdyq keńes qurý qajet dep sanaıdy
ASTANA. 28 jeltoqsan. QazAqparat /Qanat Mámetqazyuly/ -Otandyq telearnalar janynan olardyń jumysyn baǵyttap rettep otyrýmen aınalysatyn qoǵamdyq keńes qurý qajet.
Búgingi QR Parlamenti Senatynyń jalpy otyrysynda «Teleradıo habarlaryn taratý týraly» zań jobasyn talqylaý barysynda senatorlar tarapynan osyndaı pikirler aıtyldy.
«Otandyq telearnalar arqyly óz qundylyqtarymyzdy tolyq kórsete almaı kelemiz. Ulttyq, memleketshildik rýhqa tárbıeleıtin batyrlarymyz ben aqyndarymyzdy, kósemderimiz ben sheshenderimizdi, ulttyń uly tulǵalaryn nasıhattaıtyn, urpaqqa ǵıbrat beretin aǵartýshylyq baǵdarlamalar jetkiliksiz. Sondyqtan telearnalar janynan Qoǵamdyq keńes qurý qajet dep bilemin», - deıdi senator Qýanysh Aıtahanov.
Toqtala ketetin jaıt, Parlament qabyldaǵan zań boıynsha teleradıo habarlaryn taratýdy damytý máselesin keshendi sheshý maqsatynda Úkimet janynan táýelsiz konsýltatıvtik-keńesshi organ qurylatyny kózdelgen bolatyn. Al Qýanysh Aıtahanov bundaı memlekettik keńesten bólek, qoǵamdyq keńestiń bolǵany durys degendi alǵa tartady. «Bunyń quramyna bizdiń uly tulǵalarymyz, aqyn-jazýshylar, memleket pen qoǵam qaıratkerleri kirip, telearna jumystaryna baǵyt-baǵdar berip otyrsa degen usynysym bar», - dedi Q. Aıtahanov. Sonymen qatar, senator otandyq telearna habarlarynyń basym bóligi qazaqstandyq mazmundy qurýy tıistigin de erekshe atap ótti.
Sondaı-aq, óz kezeginde senator Jabal Erǵalıev zań jobasyn qoldaı otyryp, telearnalar janynan kórkemdik, qoǵamdyq keńes qurylýy tıis degendi de aıtty. «Sońǵy ýaqytta otandyq birqatar telearnalar ulttyq bitim-bolmysymyzǵa saı keletin habarlar daıyndaýdyń ornyna reseılik ónimderdi kóshirip taratýdy ádetke aınaldyryp alǵan syńaıly. Elikteýshilik basym», - deıdi depýtat. Onyń aıtýynsha, «teledıdar bettiń ádemiligin ǵana kórsetetin qural emes, ıdeologııa men tárbıe quraly».
