Senatorlar tehnıkalyq retteý salasyndaǵy zańnamany jetildirý sharalaryn usyndy
Dóńgelek ústelge qatysýshylar tehnıkalyq retteý salasyndaǵy zańnamany odan ári jetildirý, atap aıtqanda taýarlar men jabdyqtardyń sáıkestigin baǵalaý týraly qujattardyń bolýyna baqylaýdy kúsheıtýdi, «Sáıkestikti baǵalaý týraly» zań jobasynyń tujyrymdamasyn, tsıfrlandyrý jáne basqa da máselelerdi talqylady.
Senator Edil Mamytbekov óz baıandamasynda tehnıkalyq retteý týraly zań mindetteriniń biri otandyq taýar óndirýshilerdiń básekelestik artyqshylyqtaryn iske asyrý ekenin atap ótti. Ol úshin bıznesti qoldaýdyń naqty sharalary qabyldanýy kerek.
«Memleket basshysy óndiriletin ónimdegi jergilikti úlesti ulǵaıtýdyń mańyzyn birneshe ret atap ótip, tıisti tapsyrmalar bergen bolatyn. Aǵymdaǵy jylǵy 26 qańtarda Úkimettiń keńeıtilgen otyrysynda elimiz Prezıdenti ónimdegi qazaqstandyq úlesti arttyrý jónindegi mindet kúshinde ekenine taǵy da nazar aýdardy. Sonymen qatar, memlekettik satyp alýdy júzege asyrý kezinde taýar ımporttaýshylarǵa artyqshylyq beriletin jaǵdaılar áli jalǵasyp keledi. Bul rette, normatıvtik qujattar talabyna sáıkestigin rastaıtyn qujattary joq taýarlardy, onyń ishinde azamattardyń qaýipsizdigine áser etetin taýarlardy satyp alý júzege asyp jatqanyn atap ótý mańyzdy», - dedi Edil Mamytbekov.
Sondaı-aq, ishki naryqty «jańsaq» sertıfıkattarmen rastalǵan taýarlardan qorǵaý, tehnıkalyq retteý salasy deńgeıiniń tómendigi men damý qarqyny, standarttaýdyń ulttyq júıesiniń halyqaralyq talaptarǵa tolyq sáıkes kelmeýi jáne tsıfrlyq tehnologııalardy engizý arqyly ónimdi qadaǵalaýdy kúsheıtý máseleleri kóterildi.
Dóńgelek ústelge qatysýshylar EAEO tehnıkalyq retteý júıesin damytýdyń ózekti baǵyttaryn da qarady. Eýrazııalyq ekonomıkalyq komıssııanyń Tehnıkalyq retteý jáne akkredıtteý departamentiniń dırektory Tımýr Nurashevtiń aıtýynsha, bul baǵyttaǵy jumysta EAEO tehreglamentteriniń talaptaryn túsindirý tetiginiń joqtyǵy jáne olardy ázirleý men iske qosý merzimderin uzartýda birqatar problemalar bar.
Senat komıtetiniń tóraǵasy Dáýren Ádilbekov dóńgelek ústel otyrysyn qorytyndylaı kelip, qoldanystaǵy tehnıkalyq retteý jáne standarttaý júıesiniń keshendi problemalaryna nazar aýdardy, sondaı-aq senatorlardyń Úkimetke ázirlegen birqatar usynystaryn atap ótti.
«Moraldyq jáne fızıkalyq turǵydan tozǵan jabdyqtardy, sondaı-aq taýarlardyń sáıkestigin baǵalaý jónindegi eskirgen ádistemelerdi paıdalaný máselesi erekshe mańyzdy. Búginde tipti 1940 jyly shyǵarylǵan jabdyqtardyń úlgileri de qoldanylatynyn aıta ketý kerek. Osyǵan baılanysty, biz osyndaı zerthanalardy jańǵyrtýdy qamtamasyz etýge baǵyttalǵan «Bıznestiń jol kartasy» jáne «Qarapaıym zattar ekonomıkasy» baǵdarlamalary aıasynda bıznesti memlekettik qoldaý tetikterin keńeıtý múmkindigin qarastyrýdy usynamyz», - dedi Dáýren Ádilbekov.
Senator sondaı-aq tehreglamentterdi ýaqtyly iske qosý, halyqtyń qaýipsizdigin qamtamasyz etetin taýarlarǵa erekshe baqylaý júrgizý qajettigin jáne olardy sheshý úshin Úkimet pen memlekettik organdarǵa pármendi sharalar qabyldaý mańyzdy ekenin jáne basqa da birqatar máselelerdi atap ótti.
Dóńgelek ústel jumysyna saýda jáne ıntegratsııa mınıstri Baqyt Sultanov jáne salalyq memlekettik organdardyń, bıznestiń, Ulttyq akkredıtteý ortalyǵy men kommertsııalyq emes uıymdardyń ókilderi qatysty.