Senatorlar «Taza Qazaqstan» ekologııalyq aktsııasyna qatysty
ASTANA. KAZINFORM - Senat depýtattary men palata Apparatynyń qyzmetkerleri Memleket basshysy Qasym-Jomart Toqaevtyń bastamasymen ótip jatqan «Taza Qazaqstan» respýblıkalyq ekologııalyq aktsııasyna qatysty. Sonyń aıasynda uıymdastyrylǵan jalpyqalalyq senbilikte 100-ge jýyq terek, qaraǵaı jáne qaıyń kóshetteri otyrǵyzyldy.
Ekologııalyq aktsııa ál-Farabı dańǵylynyń boıynda ótti. Aýmaqty tazalaý jáne kógaldandyrý jumysyna senatorlar men Apparat qyzmetkerlerinen bólek, palata janyndaǵy Jas sarapshylar klýbynyń músheleri, Taldaý mektebiniń túlekteri, Qazaqstan bochcha federatsııasynyń ókilderi jáne eriktiler qatysty. Jalpy, elordanyń tazalyǵyna beıjaı qaramaıtyn 120-dan astam belsendi azamat jınaldy.
Memleket basshysy Qazaqstan halqy Assambleıasynyń «Birlik. Jasampazdyq. Órleý» atty jyl saıynǵy sessııasynda sóılegen sózinde «Taza Qazaqstan» jalpyulttyq naýqanynyń mańyzyna toqtalǵan edi. El Prezıdenti qorshaǵan ortanyń jaı-kúıi ortaq jaýapkershilik ekenin esten shyǵarmaý kerektigin aıtty. Sondyqtan qoǵamda ekologııa mádenıetin qalyptastyryp, tabıǵatty aıalaý qaǵıdasyn dáripteý aıryqsha mánge ıe.
«Meniń bastamammen elimizde «Taza Qazaqstan» jalpyulttyq naýqany ótip jatyr. Mundaı sharalar sý tasqyny bolǵan aımaqtarda da uıymdastyrylady. Bul eshqandaı da birrettik is-shara emes ekenin eskertemin. Barlyq óńirde aýmaqtardy kógaldandyrýǵa jáne tazalaýǵa kóp kóńil bólý kerek. Árkim ortaq iske úles qosatyn bolsa, elimiz kórkeıe túsedi. Biz qalalar men aýyldardy abattandyrýymyz qajet. Árbir úı, aýla, turǵyn úı kesheni, saıabaq jáne basqa da nysandar ákimderdiń de, jurtshylyqtyń da nazarynan tys qalmaýǵa tıis. Salamatty ári jaıly orta qalyptastyramyz desek, azamattar barynsha belsendilik tanytýy kerek. Bul – jalpy azamattyq mádenıetimizdiń deńgeıin, kerek deseńiz ultymyzdyń kelbetin kórsetedi. Qoǵam múlkine zalal keltiretin adamdardy zańmen jaýapqa tartamyz», – dedi Qasym-Jomart Toqaev.
