Senatorlar sý tasqynynan zardap shekken turǵyndarǵa arnalǵan úıler qurylysymen tanysty
JEZQAZǴAN. KAZINFORM – Senatorlar Sovetbek Medebaev pen Serik Shaıdarov Ulytaý oblysynyń turǵyndarymen kezdesip, óńirdegi ózekti máselelerdi talqylady. Olar kezdesý barysynda Parlament Senaty depýtattarynyń ótken sessııadaǵy zań shyǵarý qyzmetiniń qorytyndysy týraly aýyl turǵyndaryna aıtyp berdi.
Senatorlar sondaı-aq qoǵam qaıratkerlerimen jáne máslıhat depýtattarymen kezdesip, óńir turǵyndaryn tolǵandyratyn ózekti máselelerdi sheshý jóninde óz pikirlerimen bólisti. Talqylaý zań shyǵarýdan bastap aımaqtyń naqty máselelerine deıingi taqyryptar aýqymyn qamtydy.
Senatorlar sonymen qatar sapaly sýmen jabdyqtaýdy qamtamasyz etý maqsatynda jańa tehnologııalardy engizý josparlanyp otyrǵan Jezqazǵan qalasyndaǵy aýyz sý tazartý-sharýashylyq qurylysyn jańǵyrtý jobasymen de tanysty.
«Jezqazǵannyń jańa batys aýdanyna magıstraldyq jylý jelisin salýǵa jáne Úıtas-Aıdos sý qubyryn salýǵa jergilikti atqarýshy organdar erekshe nazar aýdarý qajet. Bul jobalar oblys ortalyǵynyń turǵyndaryn sýmen qamtamasyz etý jáne jylýmen jabdyqtaý sapasyn jaqsartýǵa tıis», - dedi senator Sovetbek Medebaev.
Parlamentshiler sondaı-aq Ulytaý aýdanynda bolyp, sý tasqynynan zardap shekken otbasylarǵa arnalyp salynyp jatqan Jezdi kentindegi úıler qurylysymen tanysty. Senatorlar qurylystyń qarqyny men sapasyna eń aldymen turǵyndardyń ózderi rıza bolýy mańyzdy ekenin atap ótti.
