Senatorlar sottalǵandardy jumyspen qamtý máselesin sheshýdi surady

NUR-SULTAN. QazAqparat - Zańnamalyq reformalar men qylmystyq saıasatty izgilendirýdiń arqasynda elimizdegi túrme halqy 30 myń adamǵa deıin azaıdy jáne Qazaqstan qazirgi ýaqytta túrme reıtıngi boıynsha álemde 100-shi orynda tur. Alaıda, bas bostandyǵynan aıyrý oryndarynda olardyń tek 30 paıyzyǵana jumys isteý múmkindigine ıe, dep habarlaıdy QazAqparat.

Osy oraıda búgin Senattyń jalpy otyrysynda depýtat Vladımır Volkov bastaǵan bir top senatordyń depýtattyq saýalynda bul másele kóterildi. Memlekettik satyp alý portaly 2019 jyldan bastap sottalǵandardy jumyspen qamtamasyz etetin kásiporyndarmen, onyń ishinde qylmystyq-atqarý júıesiniń mekemelerimen bir jerden tapsyrys berýshimen tikeleı shart jasasýǵa múmkindik bermeıdi.

«Óndiristik eskirgen ınfraqurylym, onyń ishinde qazirgi zamanǵy óndiristik qýattardyń bolmaýy, kúrdeli qarjy salýdyń qajettigi, sondaı-aq tártippen jumys isteıtin obektilerdiń jaǵdaılary kolonııalardaǵy bıznesti damytýǵa kásipkerlerdi tartpaıdy. Sottalǵandardy jumyspen qamtý eńbek daǵdylaryn damytýmen qatar, olarǵa talap-aryzdardy óteý jáne jábirlenýshilerge keltirgen zııandy tóleýge qarjy tabýǵa, sondaı-aq óz otbasylaryna qarjylyq kómek kórsetýge múmkindik beredi», - dedi Vladımır Volkov.

Depýtattar bas bostandyǵynan aıyrý túrindegi jazany tıimdi oryndaý jáne olarmen jeke jumysty uıymdastyrý úshin qamaýdaǵylardy kamerada ustaý qajet ekenin atap ótti. Jumys istep turǵan 66 túzeý mekemesiniń tek 9-ynda ǵana kamerada ustaýǵa jaǵdaıy bar eken.

«Halyqaralyq standarttardyń basty talaby – otrıadtyq ustaýdan kameralyq jaǵdaıǵa kóshý. Túzetý kolonııalarynyń kópshiligi ótken ǵasyrdaǵy keńestik qurylystyń murasy bolyp tabylady, ondaǵy jataqhana baraǵy úlgisindegi bir bólmede 100-120 adam turady. Ǵımarattar men qurylystardyń jaı-kúıin eskere otyryp, 42 túzeý mekemesi qaıta jańartýdy talap etedi», - dedi Senat depýtaty.

Senatorlar bul mekemelerde, onyń ishinde laýazymdy tulǵalar tarapynan jasalǵan tártip buzýshylyqtar men qylmystardyń aldyn alý jáne aldyn alý úshin beınebaqylaý engizý qajet ekenin atap ótti. Bul mekemelerdiń 30 paıyzy ǵana beınebaqylaý júıesimen qamtamasyz etilgen.

Sonymen qatar, Senat depýtattarynyń pikirinshe, sottalǵandardy medıtsınalyq qamtamasyz etý problemalaryna da erekshe nazar aýdarý kerek. Qylmystyq-atqarý júıesin medıtsınalyq qamtamasyz etý júıesi resýrstar, qyzmet kórsetý sapasy jáne onyń jabyq bolýyna baılanysty baqylaý turǵysynda azamattyq sektormen teń emes jaǵdaıda tur.

Medıtsınalyq qyzmettermen tolyq qamtamasyz etilmeýi, arnaýly mamandardyń bolmaýy, shuǵyl emdeýge jatqyzý problemalary, eskirgen medıtsınalyq jabdyqtar bas bostandyǵynan aıyrý oryndaryndaǵy dárigerlik qyzmetterdiń sapasy tómen bolýyna alyp keledi.