Senatorlar sot júıesin jańǵyrtý týraly zań jobalaryn qaraıdy
NUR-SULTAN. QazAqparat - QR Parlamenti Senaty bıýrosynyń músheleri osy jyldyń 11 naýryzynda ótetin Palata otyrysynyń kún tártibin bekitti, dep habarlaıdy QazAqparat.
«Depýtattar batyp ketken kemelerdi joıý týraly Naırobı halyqaralyq konventsııasyn ratıfıkatsııalaý máselesin qaraıdy. Qujat teńizdegi apattardyń zardaptaryn tıimdi joıýdaǵy biryńǵaı erejeler men rásimderdi belgileıdi. Otyrystyń kún tártibine Keden odaǵyna múshe memleketterdiń keden qyzmetteriniń Birlesken alqasy týraly shartqa ózgerister engizý týraly hattamany ratıfıkatsııalaý týraly zań jobasy da engizildi», - delingen Senat baspasóz qyzmetiniń málimetinde.
Senatorlar otyrysta budan buryn parlamentshiler bastamasymen ázirlengen zań jobalaryn da qarastyrady. Olardyń qatarynda «Qazaqstan Respýblıkasynyń sot júıesi jáne sýdıalarynyń mártebesi týraly» Konstıtýtsııalyq zańǵa, Ákimshilik quqyq buzýshylyq týraly kodekske jáne sot júıesin jańǵyrtý máselelerine qatysty basqa da zańnamalyq aktilerge ózgertýler men tolyqtyrýlar engizý týraly zań jobalary bar. Ákimshilik rásimdik-protsestik kodeksiniń 1 shildeden bastap kúshine enýine baılanysty ákimshilik ádileti júıesiniń tolyqqandy jumysynyń qamtamasyz etilýi men memlekettik organdardyń qatysýymen bolatyn sot isterinde azamattardyń kepildikteri men quqyqtaryn ulǵaıtý osy jumystardyń nátıjesi bolýy tıis.
Bıýro músheleri sonymen qatar Májilisten túsken birqatar zań jobalaryn turaqty komıssııalarǵa bólip berdi.
