Senatorlar Shymkenttegi «Qamqorlyq» ortalyǵynyń jumysymen tanysty
Senatorlar ońaltý ortalyǵynyń jumysymen tanysyp, qyzmet alýshy balalardyń ata-analary jáne mamandarmen kezdesti. Jıynda senatorlar áleýmettik salany damytý baǵytynda Parlamentte qabyldanǵan zańdar men múgedektigi bar azamattarǵa arnalǵan memlekettik aýqymdy sharalar týraly keń kólemde aıtyp ótti.
Qamqorlyq ortalyǵy «Qazaqstan halqyna» qoǵamdyq qorynyń «Qamqorlyq qory» jáne «Samuryq – Qazyna» qorlarynyń qarjylandyrýymen ashylǵan.
Aýtızmi bar balalarǵa arnalǵan ortalyqta balalar men olardyń otbasylaryna keshendi qoldaý kórsetedi. Atap aıtqanda, 1,5 pen 18 jas aralyǵyndaǵy balalar jáne jyl saıyn júıeli túrde 125 bala mamandardyń kómegin tegin alady. Ortalyq ergoterapııa, beıimdelgen jáne emdik dene shynyqtyrý, eńbek terapııasy, art-terapııa sııaqty emdeýdiń 16 - ǵa jýyq túrinen qyzmet kórsetedi.
«Jaqynda ǵana Parlamentte múgedekterdiń quqyqtary týraly konventsııaǵa fakýltatıvtik hattamany ratıfıkatsııaladyq. Onyń erejeleri múgedektik belgisi boıynsha kemsitýshilikti joıýǵa jáne ınklıýzıvtilik qaǵıdatyn iske asyrýǵa baǵyttalǵan. Inklıýzıvti qoǵam qurý úshin biz erekshe balalardy kúndelikti áleýmettik ómirge daıyndaýymyz kerek, ol úshin dál osyndaı ońaltý ortalyqtarynyń ashylýy asa mańyzdy. Ókinishke qaraı, elimizde aýtızmmen aýyratyn balalardyń sany ósken. Bir ǵana Shymkenttiń ózinde aýtızm spektri buzylǵan 220 – dan astam bala tirkelgen», - dedi senator Aıgúl Qapbarova.
Al, senator Nurlan Beknazarov memleket tarapynan múgedektigi bar balalarǵa qajetti barlyq áleýmettik daǵdylardy úıretýge múmkindik jasalyp jatqanyn aıtyp ótti.
«Mundaı ortalyqtar elimizdiń barlyq óńirlerinde ashylýy tıis. Aýtızmmen aýyratyn balalarǵa ýaqtyly medıtsınalyq, áleýmettik, pedagogıkalyq turǵyda kómek kórsetilgen jaǵdaıda olardyń 60% jalpy bilim berý baǵdarlamalary boıynsha oqýǵa qabiletti ekeni dáleldengen. Sondyqtan ortalyqta alǵan emdik sharalardyń tıimdiligine asa mán berý kerek», - dep atap ótti senator Nurlan Beknazarov.
Aıta ketıik, Senat depýtattarynyń óńirlerge jumys sapary barysynda Nurlan Beknazarov pen Aıgúl Qapbarova Shymkent qalasyndaǵy júrek ortalyǵynda boldy.. Bul Qazaqstannyń ońtústik óńirindegi halyqqa eń joǵary deńgeıde kardıologııalyq jáne kardıohırýrgııalyq kómek kórsetetin jetekshi klınıka.
Sondaı-aq, senatorlar Saıram turǵyn alabynyń turǵyndarymen kezdesti. Ashyq formatta uıymdastyrylǵan kezdesýde turǵyndar kótergen máseleniń deni ınfraqurylymmen qamtý tóńireginde boldy.
