Senatorlar Shymkentte medıtsına qyzmetkerlerimen densaýlyq saqtaý salasyn jaqsartý máselesin talqylady

ASTANA. KAZINFORM - Senat depýtattary Aıgúl Qapbarova men Alısher Satvaldıev Shymkenttegi №1 jáne №2 qalalyq aýrýhanalardyń jumysymen tanysty. 

Depýtattar búgingi kúnge deıin № 1 qalalyq aýrýhanada búırek transplantatsııasy boıynsha 225 operatsııa jáne baýyr transplantatsııasy boıynsha 35 operatsııa jasalǵany týraly habardar boldy. Depýtattarmen kezdesý barysynda dárigerler organdar donorlyǵyna qoǵamda oń kózqaras qalyptastyrý, donorlar tapshylyǵynyń aldyn alýdyń zańnamalyq tetikterin jetildirý jóninde pikir almasty.

№2 qalalyq kópsalaly aýrýhanada senatorlarǵa neırohırýrgııa ortalyǵynyń jumysy týraly aıtyldy. Munda Ulttyq neırohırýrgııalyq ortalyqtyń bilikti dárigerleri jumys isteıdi, sondaı-aq ınsýlt alǵan patsıentterdiń jan-jaqty qalpyna kelýine múmkindik beretin angıografııalyq qurylǵy ornatylǵan. Alaıda, mekeme basshylyǵynyń aıtýynsha, aýrýhana qarjynyń jetispeýshiligine baılanysty óz múmkindikterin tolyq paıdalana almaı keledi. Óıtkeni joǵary tehnologııalyq medıtsınalyq kómekke muqtaj patsıentterge qajetti qarjy ótinimge sáıkes tolyq tólenbeı otyr.

Senatorlar Shymkenttegi eki klınıkalyq aýrýhananyń jaǵdaıymen tanysty jáne osyndaǵy problemalardy baqylaýǵa alatyn boldy. Sapar barysynda naýqastar tap bolatyn problemalardy sheshý jóninde tıisti mekemelerdiń ókilderimen máselelerdi talqylady.