Senatorlar shekara shebindegi aýyldardaǵy mektepterdiń máselesin kóterdi
ASTANA. QazAqparat - Parlament Senatynyń jalpy otyrysynda depýtattar shekara shebindegi eldi mekenderdegi mektepterdiń máselesin kóterdi. Osy oraıda QR Úkimet basshysy Baqytjan Saǵyntaevtyń atyna depýtattyq saýal joldandy, dep habarlaıdy QazAqparat.
«Aǵymdaǵy jyldyń tamyz aıynda óńirlerde bolǵan is-saparamyz barysynda Marqakól men Úlken Naryn aýmaqtarynyń turǵyndary memleket tarapynan sheshilip jatqan jumystardy aıta otyryp, qordalaǵan máselelerdi de kótergen edi. Árıne, shekara shebindegi eldi mekenderdegi mıgratsııanyń jaǵymsyz saldosyna álemde úrdiske aınalǵan ýrbanızatsııa, mobıldi baılanys pen ınternet sapasynyń tómendigi jáne zamanaýı kommýnıkatsııamen qamtý faktorlarynyń áseri barshamyzǵa túsinikti. Bizdiń depýtattyq saýalymyzǵa ShQO-nyń shekara mańynda ornalasqan Kúrshim jáne Katonqaraǵaı aýdandarynda týyndap otyrǵan halyq sany az aýyldyq jerlerde mektepterdiń jabylýy sebep boldy. Bul jaǵdaı elimizdiń kóptegen shekaralyq aımaqtaryna da tán ekeni daýsyz», - dedi depýtat Dúısenǵazy Mýsın.
Osy oraıda ol alańdatyp otyrǵan statıstıkalyq derekterge toqtaldy. Máselen, Katonqaraǵaı aýdany halqynyń sany sońǵy 20 jylda 29 myń adam azaıǵan, alty aýyl eldi meken mártebesinen aıyryldy. Sonymen qatar atalǵan merzim ishinde oqýshy sany azaıǵandyqtan, mektepterdiń jabylýy baıqaldy. Budan bólek senator sońǵy 20 jylda tek Marqakól óńirindegi halyq sany 2 esege azaıǵanyn atap ótti.
«Keltirilgen derekter shekara mańynyń ıesiz mekenge aınalýynyń dáleli. Sondyqtan bul úderisti toqtatý sharalaryn jedeldetý, eldi mekenderdi nyǵaıtyp, kóptep qonystandyrý strategııalyq mańyzy bar másele bolyp otyr. Mektep sanyn qysqartý týraly másele jalpy shekara aımaǵyndaǵy problemalardy keshendi túrde sheshý arqyly qarastyrylǵan durys dep sanaımyz. Bul baǵytta ShQO basshylyǵy arnaıy jospar jasap, Úkimetke birqatar usynystaryn joldaǵany málim», - dedi depýtat.
Joǵaryda aıtylǵanǵa baılanysty, Bilim jáne ǵylym mınıstrligi tarapynan bilim berý uıymdary jelisi normatıvine negizgi jáne orta mektepterdiń qyzmet etýi úshin normany tómendetýge qatysty ózgerister engizý usynyldy.
«Sonymen qatar, mektepterdi qoldaý, olardyń jabylýyn toqtatýǵa baǵyttalǵan ózgerister, naqty is-sharalar qarastyrylyp, ońtaıly sheshimderi qabyldanýyn usynamyz. Elbasynyń kezekti Joldaýynda bergen tapsyrmalaryn oryndaý maqsatynda, shekara aımaǵyndaǵy mektepter máselesi eldi mekenderdi damytý josparymen ushtastyrylyp, ázirlenetin óńirlerdi damytýdyń 2025 jylǵa deıingi baǵdarlamasynda jáne elimizdiń 2030 jylǵa deıingi aýmaqtyq keńistik damýynyń boljamdy kestesinde arnaıy sharalar kesheni retinde erekshe oryn alýy qajet dep sanaımyz», -dedi Dúısenǵazy Mýsın.
