Senatorlar saılaýǵa daıyndyq barysy týraly sheteldik baıqaýshylardy habardar etti

ASTANA. QazAqparat - QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Asqar Shákirov Parlament Májilisine saılaý barysyn baqylaýǵa kelgen Eýropadaǵy qaýipsizdik jáne yntymaqtastyq uıymy Parlamenttik Assambleıasynyń baıqaýshylaryna arnalǵan brıfıngide sóz sóıledi.

Senator óz sózinde halyqaralyq bedeldi uıymdardyń atynan kelgen táýelsiz baıqaýshylardyń saılaýǵa monıtorıng júrgizýi mańyzdy ekenin atap ótti.

EQYU PA jáne DIAQB-tyń ókiletti mıssııasynyń osy monıtorıngke qatysýyn Qazaqstandaǵy demokratııalyq reformalardy qoldaýdyń belgisi retinde qarastyrǵan jón.

«2022 jyly biz prezıdenttik saılaý ótkizgen bolatynbyz, odan keıin barlyq negizgi bılik ınstıtýttarynda dáıekti túrde qaıta jańartý protsesi bastaldy. Aldaǵy parlamenttik saılaý osy protsestiń jalǵasy bolyp tabylady. Bizdiń elimiz demokratııalyq joǵary standarttar men erejelerge, onyń ishinde Kopengagen qujatyna sáıkes erkin jáne ádil saılaý ótkizý úshin barlyq qajetti sharalardy qabyldap keledi jáne saılaý protsesiniń barlyq salalary boıynsha EQYU Parlamenttik Assambleıasymen syndarly yntymaqtastyqqa daıyn», - dep atap ótti Senat depýtaty.

Senator sondaı-aq Belarýs Respýblıkasynan, Rýmynııa Respýblıkasynan, Jerorta teńizi elderiniń Parlamenttik Assambleıasynan kelgen baıqaý mıssııalarynyń ókilderimen de kezdesti.