Senatorlar saılaý týraly zań jobalaryn qaraıdy
Onda depýtattar 2021 jylǵy 20 mamyrda ótetin Senat otyrysynyń kún tártibin talqylady, dep habarlaıdy QazAqparat QR Parlamenti Senatynyń baspasóz qyzmetine silteme jasap.
Palata otyrysynda senatorlar «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zańnyń jobasyn qaraıdy.
Bul qujat Memleket basshysynyń tapsyrmasyn oryndaý maqsatymen ázirlenip jatyr. Zań jobasy aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń ákimderin tikeleı saılaý júıesin engizýdi kózdeıdi. Qujattaǵy jańa normalar saılaý kezinde saıası partııalardyń ótý shegin de tómendetedi.
Zań qabyldanǵannan keıin saıası partııalarǵa depýtattyq korpýstan oryn alý úshin saılaýshylardyń 5 paıyz daýsyn jınasa jetkilikti bolady. Odan bólek, barlyq deńgeıdegi saılaý bıýlletenderine «bárine qarsymyn» degen jazý qosylady.
Sonymen qatar «Qazaqstan Respýblıkasynyń keıbir zańnamalyq aktilerine saılaý máseleleri boıynsha ózgerister men tolyqtyrýlar engizý týraly» zań jobasy da Senat otyrysynyń kún tártibine shyǵaryldy.
Bul zań jobasy negizinen jergilikti ózin-ózi basqarý júıesin nyǵaıtýdy, jergilikti halyqtyń óz konstıtýtsııalyq quqyqtaryn paıdalaný kezindegi belsendiligin arttyrýdy jáne saıası partııalardyń róli men jaýapkershiligin kúsheıtýdi maqsat tutady.
Aldaǵy otyrysta senatorlar «2021-2023 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasyn da qaraıdy.
Budan basqa, Bıýro otyrysynda Memleket basshysynyń ekonomıkalyq jáne saıası bastamalaryn zańnamalyq turǵydan qamtamasyz etý boıynsha Prezıdent tapsyrmalarynyń oryndalý barysy týraly aqparat tyńdaldy.
Sondaı-aq, otyrys kezinde Senattyń turaqty Komıtetteriniń tóraǵalary depýtattardyń óńirlerge jasaǵan saparlarynyń qorytyndylary týraly baıandady jáne Májilisten kelip túsken zań jobalary Komıtetterge bólinip berildi.