Senatorlar saılanǵan aýyl ákimderimen kezdesti

KÓKShETAÝ. QazAqparat - Senatorlar - «Óńir» depýtattyq tobynyń músheleri Erik Sultanov, Nurlan Beknazarov, Sergeı Ershov jáne Dúısenǵazy Mýsın jergilikti memlekettik basqarý máselelerin qaraý jónindegi otyrysqa daıyndyq aıasynda Aqmola oblysynda keńes ótkizdi.

Bul týraly QazAqparat Senattyń baspasóz qyzmetine silteme jasaı otyryp habarlaıdy.

Oblys ákiminiń orynbasary, jergilikti atqarýshy organdardyń ókilderi qatysqan keńeste birqatar mańyzdy máseleler talqylandy. Atap aıtqanda, senatorlar aýdandyq mańyzy bar qalalar, aýyldar, kentter men aýyldyq okrýgter ákimderiniń tikeleı saılaýyn ótkizýge erekshe nazar aýdardy.

«Memleket basshysynyń 2020 jylǵy 1 qyrkúıektegi Qazaqstan halqyna Joldaýyndaǵy aýyl ákimderiniń tikeleı saılaýyn ótkizý jónindegi tapsyrmasyna sáıkes, 2021 jyly elimizde eń alǵash ret aýyl ákimderin tikeleı saılaý ótken bolatyn. 2021 jyldyń 25 shildesinen jyl sońyna deıin elimizdiń 14 oblysynyń 864 aýyldyq okrýginde aýyl ákimderiniń saılaýy ótti», - dep atap ótti Nurlan Beknazarov.

Kún tártibindegi taǵy bir másele - aýdandyq, qalalyq jáne aýyldyq bılik deńgeıleriniń derbestigi men jaýapkershiligin keńeıtý máseleleri talqylandy. Senatorlar saılanǵan ákimderdiń, atap aıtqanda tórtinshi deńgeıdegi bıýdjet máseleleri jónindegi usynystary men oı-pikirin tyńdady.

Depýtattar óz kezeginde kezdesýde aıtylǵan problemalyq máseleler bıylǵy jyldyń 24 qańtarynda «Óńir» depýtattyq tobynyń qorytyndy keńeıtilgen otyrysynda kóterilgenin jáne zerdelengenin atap ótti.

Erik Sultanov keńesti qorytyndylaı kelip: «Memleket basshysynyń saıası bastamasyn iske asyrý týraly máseleler «Óńir» depýtattyq tobynyń búgingi kún tártibinde tur. Sondyqtan Aqmola oblysynda osy máselelerdi talqylaý boıynsha kezdesý ótkizdik. Problemalyq máseleler men naqty usynystar tyńdaldy. Endi olardyń zańnamalyq sheshimi boıynsha jumys isteıtin bolamyz», - dedi.

Senatorlar sonymen qatar aımaqtyń birqatar ónerkásiptik nysandaryn da aralady. Olardyń arasynda sút ónimderin óndirý, aýyl sharýashylyǵy tehnıkasyn satý jáne qyzmet kórsetý kásiporyndary bar.