Senatorlar Saǵyntaevqa: Sý tasqynynan zardap shekkenderdiń shyǵynyn kim óteıdi
ASTANA. QazAqparat - QR Parlamenti Senatynyń depýtaty Marat Taǵymov óz áriptesteri atynan el Premer-Mınıstri Baqytjan Saǵyntaevqa depýtattyq saýal joldap, sý tasqynynan zardap shekken halyqtyń mıllıondaǵan shyǵynyn kim óteıtinin surady, dep habarlaıdy QazAqparat.
«Búgingi kúni Qazaqstannyń birneshe óńirin sý apaty alyp otyr. Resmı aqparatqa sáıkes, elimizdiń ortalyq jáne soltústik óńirlerinde sý tasqyny 11 sáýirden bastap beleń aldy. Aqmola, Aqtóbe, Qaraǵandy, Qostanaı, Pavlodar, Soltústik Qazaqstan oblystarynyń birqatar eldi mekenderi men joldardy erigen qar sýy shaıyp kete jazdady. Otandastarymyz úıinen, bar jıǵan-tergeninen aıyrylyp, bes myńnan astam úı qojaıyndyqtary qular aldynda, myńdaǵan qazaqstandyq osyndaı qıyn jaǵdaıǵa dýshar bolyp otyr. Jergilikti atqarýshy bılik pen quzyrly memlekettik organdar jyl basynan bastap depýtattar aldynda tasqyn sýdyń aldyn-alý sharalaryna qyrýar qarjy bólýdi qorǵaıdy. Alaıda, jyl saıyn osyndaı jaǵdaı qaıtalanyp, sý tasqyny biz úshin úırenshikti tótenshe jaǵdaıǵa aınaldy», - dep atap ótti senator.
Onyń aıtýynsha, tótenshe jaǵdaı bastalǵannan beri Aqmola oblysyna qarasty Atbasar qalasynda 454 úı sýǵa ketip, 1379 adam kóshirilgen, Soltústik Qazaqstan oblysynda 400-den astam úı sý astynda qalý qaterinde, Aqtóbe oblysynda 500-den astam turǵyn úı sý astynda qalǵan. «Al quzyrly memlekettik organdar bolsa, osyndaı jaǵdaı Aqmola, Aqtóbe, Qaraǵandy, Qostanaı, Jambyl oblystaryndaǵy sý qoımalaryna tasqyn jáne erigen qar sýy tolassyz aǵyp kelýine baılanysty aǵyzatyn sýdyń mólsherin sál qosý qajet bolýy sebebinen eldi mekender men avtojoldardy sý basty dep qoldaryn qýsyryp otyr. Endigi bizdiń saýalymyz: nelikten osy kúnge deıin quzyrly organdardyń jaýapty qyzmetkerleri óziniń kásibı sheńberiniń tarlyǵyn tabıǵı ataklızmderimen jasyryp keledi? Olardyń jaýap beretin kúni kele me? Ádilettik úshin atap ketýimiz de jón, búgingi tańda tótenshe jaǵdaı komıtetiniń azamattary óz boryshyn adal oryndap keledi. Biraq zardap shekken turǵyndardyń kóptegen mıllıon shyǵynyn kim óteıdi? El aman, jurt tynyshta bundaı jaǵdaıǵa jergilikti bıliktegi azamattar qalaı jol bergen?», - dedi Taǵymov.
Senatordyń aıtýynsha, osy rette otandastarymyzdy tolǵandyryp otyrǵan eki másele týyndap otyr.
«Birinshiden, qıyn jaǵdaıǵa dýshar bolǵan jerlesterimizge Úkimet tarapynan qandaı járdem kórsetiledi? Ekinshiden, bundaı jaǵdaı qaıta oryn almas úshin Úkimet qandaı sharalar qolǵa almaq?», - dep atap ótti ol.
