Senatorlar Reseıge polıgondardyń arzan baǵamen jalǵa berilip jatqanyna alańdaýshylyq bildirdi

Aıta keteıik, jalpy otyrysta Qazaqstan men Reseı arasyndaǵy 929 Memlekettik ushý-synaq ortalyǵynyń obektileri men jaýyngerlik alańdaryn jaldaý týraly shartqa ózgerister engizý týraly hattama qabyldanǵan bolatyn.

«AQSh áskeri zor memleket, álemniń 800 jerinde olardyń áskerı bazalary men polıgondary bar. Dese de, Germanııadaǵy Ramshtaın atty shaǵyn ǵana aýmaqty alyp jatqan polıgon úshin AQSh jylyna jaldaýy aqysy retinde 1,5 mln eýro tóleıdi. Al Qazaqstan Reseıden nebári gektaryna 200-400 teńge alyp otyr. Árıne, Qazaqstan men Reseı áriptes, dos memleket. Buny túsinemiz. Alaıda, AQSh pen Germanııa da dos, NATO músheleri. Endeshe biz ekonomıkalyq múddemizdi jiberip jatqan joqpyz ba?» dedi senator Murat Baqtııaruly.

Óz kezeginde QR Qorǵanys mınıstriniń orynbasary, general-leıtenant Oqas Saparov kelisim 1995 jyly uzaqmerzimge jazylǵanyn aıta kele, Reseı Qazaqstannyń strategııalyq áriptesi ekenin, olar elimizge áskerı kómekter berip otyrǵanyn alǵa tartty. Al senator Muhtar Altynbaev polıgondy jaldaý baǵasyn naqtylaı kele, saraptama boıynsha Reseı gektaryna 2,33 dollar tóleıtindigin atap ótti. «Qazirgi teńge baǵamy boıynsha bul 800 teńgeden asady. Qazaqstan zańy boıynsha da segiz júz teńgeden kem bolmaýy kerek», dedi senator.

Bul máselege depýtat Qýanysh Aıtahanov ta alańdaýshylyq bildirip, keleshekte osyny qaıta qaraý qajettigin alǵa tartty. Onyń aıtýynsha, Qazaqstanda bir gektar jaıylym jerdi halyqqa jalǵa berýdiń ortasha quny 1700-5000 teńgeniń arasynda. Al Reseı jalǵa alyp otyrǵan polıgon úshin múldem tómen tólemder qarastyrylǵan. «Onyń ústine biz salyqqa tólem túsý úshin halyqqa jalǵa beriletin jerler baǵasyn taǵy da kóterdik. Endi Reseıge jalǵa berilip otyrǵan polıgondardy qarasańyz olar qorshaǵan ortaǵa da zalalyn tıgizedi, mańynda ornalasqan aýyldarǵa yqtımal qaýipter de joq emes. Bunyń bári nege eseptelmeıdi? Osynyń bárin eseptesek, bizdiń Reseıge jalǵa berip otyrǵan jerlerimizdiń quny tym tómen dep sanaımyn. Bul eń quryǵanda qarapaıym halyqqa jalǵa berilip otyrǵan jaıylym baǵasymen teńesý kerek edi. Biz qarapaıym halyqqa jaıylym úshin jerdi gektaryna 2000 teńgeden, al Reseıge polıgon úshin 400 teńgege berip otyrmyz. Bul qalaı?», dedi Q. Aıtahanov.