Senatorlar Pavlodar, SQO, Atyraý oblystarynda sharýalarmen jáne jergilikti halyqpen kezdesti
ASTANA. QazAqparat - Parlament Senatynyń depýtattary Asqat Kúzekov, Manap Kóbenov pen Vladımır Bobrov Pavlodar oblysynda jumys babyndaǵy saparmen boldy.
3 mamyrda senatorlar A. Kúzekov pen M. Kóbenov Baıanaýyl aýdanyndaǵy qoǵam qaıratkerlerimen, aqsaqaldarymen, ákimdik qyzmetkerlerimen jáne kásiporyndar basshylarymen kezdesý barysynda Jer kodeksindegi jańalyqtar týraly áńgimelep, jer qatynastaryna qatysty ózekti máselelerdi túsindirdi.
Senatorlar A. Kúzekov, M. Kóbenov jáne V. Bobrov taıaý kúnderi Aqtoǵaı, Ertis jáne Pavlodarskıı aýdandaryna barady.
Sondaı-aq, Qazaqstan Respýblıkasy Parlamenti Senatynyń depýtattary Qaırat Işanov pen Sársenbaı Eńsegenov aımaqtarǵa sapar aıasynda Atyraý oblysynda boldy.
Senatorlar Mahambet aýdanyndaǵy Aqtoǵaı aýyly men Inder aýdanyndaǵy Órlik aýylynda bolyp, aýdan basshylyǵymen, aýdandyq máslıhat depýtattarymen jáne birneshe sharýa qojalyqtarynyń eńbekkerlerimen kezdesti. Júzdesý barysynda Memleket basshysynyń «Nurly jol» baǵdarlamasy men bes ınstıtýttyq reformasyn iske asyrý jónindegi «100 naqty qadam» Ult josparyn júzege asyrý jónindegi Senattyń zań shyǵarý jumysy týraly tanystyryldy. Sondaı-aq Qazaqstan halqy Assambleıasynyń sessııasynda qabyldanǵan «Máńgilik el» patrıottyq aktisiniń mańyzy týraly aıtyldy.
Depýtattar Atyraý qalasy aımaǵyndaǵy Bekire balyq ósirý zaýytynyń ujymymen kezdesý barysynda elimizdiń 2016-2018 jyldarǵa arnalǵan respýblıka bıýdjetine engizilgen ózgerister men tolyqtyrýlarǵa toqtalyp, balyq sharýashylyǵyn órkendetýdiń ózekti máseleleri týraly oılaryn ortaǵa saldy.
Senatorlar aldaǵy kúnderde H.Dosmuhamedov atyndaǵy Atyraý memlekettik ýnıversıtetiniń stýdentterimen, professorlyq-oqytýshylar quramymen kezdesýdi josparlap otyr.
Al, Senator Olga Perepechına Soltústik Qazaqstan oblysy, Qyzyljar aýdany, Vodoprovodnyı aýylyndaǵy «Janbaı» jáne Novokamenka aýylyndaǵy «Karasev jáne K» JShS-tiń eńbek ujymdarymen kezdesip, «Jer kodeksine ózgerister men tolyqtyrýlar engizý týraly» zańnyń erejelerin túsindirdi. Kezdesý barysynda aýyl sharýashylyǵyna arnalǵan jerlerdi tıimdi jáne jańashyldyqpen paıdalaný, jer telimin paıdalaný maqsatyn almastyrý rásimderin ońaılatý sekildi máseleler egjeı-tegjeıli talqylandy.
Senator eńbekkerlerge «100 naqty qadam» Ult josparyn iske asyrý aıasynda Parlamenttiń zań shyǵarý jumysy týraly da aıtty.
2016 jylǵy 4 mamyrda depýtat Qazaqstan Respýblıkasy Ulttyq bankiniń Soltústik Qazaqstan oblystyq bólimshesiniń basshylyǵymen jáne aımaqtyq «Tutynýshylar men kásipkerlerdi qorǵaýdyń assotsıatsııasynyń» tóraǵasymen kezdesti. Júzdesý barysynda «Kollektorlyq qyzmet týraly», «Qazaqstan Respýblıkasynyń keıbir zańnamalyq aktilerine kollektorlyq qyzmet máseleleri boıynsha ózgerister men tolyqtyrýlar engizý týraly» zań jobalary, sondaı-aq Jer kodeksiniń negizgi erejeleri talqylandy.
