Senatorlar palatanyń aldaǵy otyrystarynyń kún tártibin bekitti

ASTANA. QazAqparat - Senat Spıkeri Máýlen Áshimbaevtyń tóraǵalyǵymen ótken Palata Bıýrosynyń otyrysynda depýtattar 4 jáne 11 mamyr kúnderi ótetin Senat otyrystarynyń kún tártibin bekitti, dep habarlaıdy QazAqparat.

Soǵan sáıkes 4 mamyr kúni senatorlar «Kedendik tranzıttiń kedendik rásimine sáıkes taýarlardy tasymaldaý (tasý) kezinde kedendik bajdardy, salyqtardy, arnaıy, dempıngke qarsy, ótemaqy bajdaryn tóleý jónindegi mindetti oryndaýdy qamtamasyz etýdi qoldanýdyń erekshelikteri týraly kelisimdi ratıfıkatsııalaý týraly» zańdy qaraıdy.

Qujatta qarastyrylǵan normalar kedendik tranzıt kezinde kedendik bajdardy, salyqtardy, arnaıy, dempıngke qarsy, ótemaqy bajdaryn tóleý kezinde qolaıly jaǵdaılar jasaýdy kózdeıdi. Kelisimdi ratıfıkatsııalaý arqyly EAEO-nyń tranzıttik áleýetin damytýǵa yqpal etedi jáne taýardy tasymaldaý jaǵdaıy jaqsarady dep kútilip otyr.

Al, 11 mamyr kúni bolatyn Senat otyrysynda depýtattar «TMD-ǵa qatysýshy memleketterdiń aqparattyq-telekommýnıkatsııalyq jelilerde avtorlyq quqyq pen sabaqtas quqyqtar obektilerine quqyqtardy saqtaý jáne qorǵaý boıynsha yntymaqtastyǵy týraly kelisimdi ratıfıkatsııalaý týraly» zańdy qaraıdy. Zań avtorlyq quqyqtyń buzylýyna qarsy is-qımyldyń quqyqtyq tetikterin qalyptastyrady, sondaı-aq TMD elderiniń ózara saýda-ekonomıkalyq jáne mádenı baılanystaryn keńeıtýge yqpal etedi.

Sonymen qatar Bıýro otyrysynda Májilisten kelip túsken zańdar jumys úshin Senattyń turaqty Komıtetterine bólinip berildi.