Senatorlar palata otyrysynyń kún tártibin bekitti
ASTANA. KAZINFORM – Senat spıkeri Máýlen Áshimbaevtyń tóraǵalyǵymen Palata Bıýrosynyń otyrysy ótti. Onda depýtattar 12 jeltoqsanda bolatyn Senat otyrysynyń kún tártibin bekitti.
Sondaı-aq is-sharada Palata Komıtetteriniń osy aptadaǵy kóshpeli otyrystarynda qaralatyn máseleler talqylandy.
Aldaǵy beısenbide senatorlar «Qazaqstan Respýblıkasy men Azııa Damý Banki arasyndaǵy qaryz týraly kelisimdi (Jaı operatsııalar) (Fıskaldyq basqarý jáne qarjy sektory reformalarynyń baǵdarlamasy – 1-kishi baǵdarlama) ratıfıkatsııalaý týraly», «Qazaqstan Respýblıkasy men Azııa Infraqurylymdyq Investıtsııalar Banki arasyndaǵy qaryz týraly kelisimdi (Fıskaldyq basqarý jáne qarjy sektory reformalarynyń baǵdarlamasy – 1-kishi baǵdarlama) ratıfıkatsııalaý týraly» jáne «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy qaryz týraly kelisimdi («Inklıýzıvti jáne turaqty ekonomıkalyq ósý» atty damý saıasatyn qarjylandyrýǵa arnalǵan qaryz) ratıfıkatsııalaý týraly» zańdardy qaraıdy.
Sondaı-aq Palata otyrysynda «Qazaqstan Respýblıkasynyń keıbir zańnamalyq aktilerine Memlekettik bilim berý jınaqtaý júıesi, aqparat, qoǵamdyq damý, mádenıet jáne arhıv isi salalarynda artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zań qaralady. Bul zańda «Keleshek» biryńǵaı erikti jınaqtaýshy júıesiniń qyzmetin quqyqtyq retteý kózdelgen. Atalǵan júıeni qurý jóninde Memleket basshysy óziniń «Ádiletti Qazaqstannyń ekonomıkalyq baǵdary» atty Joldaýynda aıtqan bolatyn.
«Keleshek» baǵdarlamasy joǵary bilim berýdi, kolledjde nemese magıstratýrada oqýdy qosa alǵanda, bilim berý jınaqtaryn qalyptastyrýǵa arnalǵan. Bul bastama memlekettiń, ata-analardyń jáne qarjy ınstıtýttarynyń qatysýyn kózdeıdi.
Sonymen qatar Bıýro otyrysynda Májilisten kelip túsken zańdar jumys úshin Senattyń turaqty Komıtetterine bólinip berildi.