Senatorlar Palata otyrysynda bıýdjet kodeksin qaraıdy

ASTANA. KAZINFORM — Senat spıkeri Máýlen Áshimbaevtyń tóraǵalyǵymen Palata Bıýrosynyń otyrysy ótti. Onda depýtattar 6 aqpan kúni ótetin Senat otyrysynyń kún tártibin bekitti jáne Palatanyń is-sharalar josparyn iske asyrý aıasynda osy aptada atqarylatyn jumys barysyn talqylady.

Belgilengen kún tártibine sáıkes aldaǵy beısenbide senatorlar «Qazaqstan Respýblıkasynyń Bıýdjet kodeksi jóninde» jáne oǵan ilespe «Qazaqstan Respýblıkasynyń keıbir zańnamalyq aktilerine bıýdjet zańnamasyn jetildirý máseleleri boıynsha ózgerister men tolyqtyrýlar engizý jáne «Kontsessııalar týraly» zańnyń kúshi joıyldy dep taný týraly» zańdardy qaraıdy.

Bıýro músheleri Memleket basshysy 2022 jylǵy 1 qyrkúıektegi «Ádiletti memleket. Birtutas ult. Berekeli qoǵam» atty Joldaýynda júktegen mindetterdi júzege asyrý maqsatymen atalǵan tıisti qaýlyny qabyldady.

Zań bıýdjettik protsesti túbegeıli ońaılatýdy, «bıýdjetti basqarýdan» «nátıjelerdi basqarýǵa» kóshý jolymen bıýdjettik saıasat modelin reformalaýdy, sondaı-aq, bloktyq bıýdjet elementterin engizýdi, bıýdjettik saıasattyń shekti parametrlerin aıqyndaýdy jáne fıskaldyq ortalyqsyzdandyrýdy kúsheıtýdi kózdeıdi.

Bıýro otyrysynda depýtattar osy aptada naqty máselelerge arnalyp ótkiziletin otyrystardyń kún tártibin de pysyqtady. Atap aıtqanda, EAEO sheńberinde kedendik ákelý bajdary, zııatkerlik menshik, elimizdiń maqta salasyn damytý jáne ony qaıta óńdeý sııaqty birqatar ózekti taqyryp boıynsha uıymdastyrylatyn otyrystar týraly sóz boldy.

Sonymen qatar Bıýro otyrysynda buǵan deıin Májilisten kelip túsken zańdar jumys úshin Senattyń turaqty komıtetterine bólinip berildi.