Senatorlar otandyq medıtsınanyń ózekti máselelerin zerdeledi
ASTANA. QazAqparat - Birǵanym Áıtimova bastaǵan Senattyń Áleýmettik-mádenı damý jáne ǵylym komıtetiniń depýtattary elordadaǵy Travmatologııa jáne ortopedııa ǵylymı-zertteý ınstıtýtynyń jumysymen tanysty.
Mınıstrlik basshylyǵymen jáne TOǴZI qyzmetkerlerimen kezdesý barysynda B. Áıtimova Qazaqstan Respýblıkasynyń Prezıdenti N. Nazarbaev jarııa etken «5 ınstıtýttyq reformany iske asyrý jónindegi 100 naqty qadam» Ult josparyn oryndaý jónindegi Parlamenttiń qyzmeti týraly habardar etti. Senat komıtetiniń basshysy óz sózinde Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýyndaǵy basymdyqtardy zańnamalyq turǵyda qamtamasyz etýge basa nazar aýdardy.
Senator densaýlyq saqtaý júıesin jańǵyrtýdaǵy ınstıtýttyń eleýli úlesin atap ótti.
TOǴZI dırektory Nurlan Batpenov ınstıtýt jumysymen tanystyrdy jáne onyń qyzmetindegi negizgi kórsetkishter týraly aıta kelip, ınstıtýttaǵy jáne búkil elimizdegi travmatologııa-ortopedııa qyzmetindegi ózekti máselelerge toqtaldy.
Instıtýt ujymymen otandyq densaýlyq saqtaý salasyn damytýdyń keleshegi týraly múddeli pikirsaıys óristedi.
Sharany qorytyndylaı kelip, komıtet tóraǵasy B. Áıtimova senatorlar osy medıtsınalyq mekemeniń jaǵdaıymen ǵana emes, jalpy medıtsına salasynyń ahýalymen habardar bolǵanyn jetkizdi. Aıtylǵan usynystar elimizdegi saqtandyrý medıtsınasy salasynyń normatıvtik-quqyqtyq bazasyn qalyptastyrý barysynda eskeriletin bolady.
Bul sapar mindetti áleýmettik medıtsınalyq saqtandyrýdyń jańa úlgisin engizýge ázirlik aıasynda komıtet múshelerin medıtsınalyq uıymdarmen tanystyrý sharalary baǵdarlamasy boıynsha júzege asqan bolatyn. Komıtet buǵan deıin Mindetti áleýmettik medıtsınalyq saqtandyrý qory men «Ulttyq neırohırýrgııa ortalyǵy» aktsıonerlik qoǵamynyń basshylyǵymen de kezdesý ótkizgen bolatyn.
