Senatorlar otandyq bıznesti qoldaýdyń mańyzdylyǵyn atap ótti
Depýtattar jergilikti turǵyndardy áleýmettik taýarlarmen qoljetimdi baǵada qamtamasyz etetin dúkende boldy. Munda kelýdegi basty sebep – qazirgi ınflıatsııa jaǵdaıynda baǵa ózgerisinde alypsatarlyqqa jol bermeýge baǵa berý jáne qalyń kópshilik tutynatyn taýarlarǵa tapshylyqty tekserý boldy.
Jańadan ashylǵan dúkender jelisi qala turǵyndaryn azyq-túlikpen qamtamasyz etip qana qoımaı, qosymsha jumys kózi bolyp tabylady. Senat depýtattary dúken sórelerinde otandyq ónimge molshylyq bolýy tıis ekenin aıta kelip, bul tásil tıisinshe shaǵyn jáne orta kásipkerliktiń damýyna jáne taýarlar baǵasynyń syrtqy áserlerden derbes bolýyna yqpal etetinin jetkizdi.
Senatorlar jıhaz jáne metall buıymdaryn shyǵaratyn kásiporynda da boldy. Kásiporyn ókilderi bul kezdesýde ekologııalyq taza materıaldar ǵana paıdalanylatynyn aıtty. Depýtattar óz kezeginde osyndaı kásiporyndarǵa qoldaý kórsetý men olardyń keńinen qanat jaıýyna múmkindik jasaýdyń mańyzdy ekenine toqtaldy.
Senatorlar qala ákimdiginde bolǵan kezde qalanyń ınfraqurylymdyq jáne áleýmettik-ekonomıkalyq damý jospary tanystyryldy.
«Turǵyndardy aýyz sýmen jáne elektr energııasymen qamtamasyz etý qalanyń ózekti máselesi bolyp tabylady. Qala aýmaǵynyń jyldam ulǵaıýyna baılanysty ómirlik mańyzy bar ınfraqurylym máselelerin turaqty baqylaýda ustaý qajet», - dedi Dáýren Ádilbekov.
Senatorlar bıýdjettiń tórtinshi deńgeıiniń jumys isteý máselelerine erekshe nazar aýdardy. Depýtattar salyqtyń aýqymdy kólemin el bıýdjetine bıznes sýbektileri aýdaratynyn atap ótti. Bul rette mundaı salyq júktemesin bıznes sýbektilerine saýatty túsindirý, sondaı-aq ákimshilik tarapynan memlekettik qoldaý sharalaryn tıimdi júrgizý mańyzdy bolyp otyr.
Depýtattar árbir nysannyń aǵymdaǵy jumystarymen jáne problemalarymen egjeı-tegjeıli tanysty jáne olardyń joǵary deńgeıde qaralýy úshin bar kúsh-jigerin salatyndaryn aıtty.
