Senatorlar órtten zardap shekkenderge kómek retinde bir kúndik jalaqylaryn aýdarady

NUR-SULTAN. QazAqparat – Parlament Senatynyń depýtattary Qostanaı oblysynda órtten zardap shekkenderge kómek retinde bir kúndik jalaqylaryn aýdaratyn boldy. Bul týraly Palata spıkeri áleýmettik jelidegi paraqshasynda jazdy, dep habarlaıdy QazAqparat.

«Qostanaı oblysyndaǵy tótenshe jaǵdaı bárimizdi alańdatyp otyr. Turǵyn úıler, orman men aýylsharýashylyǵy jerleri otqa orandy. Ókinishke qaraı, adam shyǵyny da tirkeldi. Qaza tapqan azamattyń jaqyndary men týǵan-týystaryna qaıǵylaryna ortaqtasyp, kóńil aıtamyz», - dep jazdy Máýlen Áshimbaev.

Memleket basshysynyń tapsyrmasymen apatty aýyzdyqtaý úshin Arnaıy jedel shtab qurylǵanyn, Úkimetke tótenshe jaǵdaı saldaryn joıý úshin qajetti qarajat bólý jáne baspanalarynan aıyrylǵan azamattarǵa arnap jańa turǵyn úıler salý jumysyn jedel bastaý jóninde tapsyrma berilgenin aıta kele, Palata spıkeri apatpen kúres jumystaryna Parlament Senaty da úles qosatynyn jetkizdi.

«Qostanaı oblysynan saılanǵan senatorlar jedel shtabtyń jumysyna atsalysyp jatyr. Sondaı-aq, Senat depýtattary zardap shekkenderge kómek retinde bir kúndik jalaqylaryn aýdarady. Osyndaı jaǵdaıda birligimizdi tanytyp, judyryqtaı jumylý asa mańyzdy. Zardap shekkenderdiń saýyǵyp ketýlerin jáne jaǵdaıdyń tezirek turaqtalýyn tileımiz», - deıdi Máýlen Áshimbaev.

Buǵan deıin habarlaǵanymyzdaı, Qostanaı óńirinde órtten zardap shekken turǵyndarǵa kómek berýge arnalǵan biryńǵaı qoǵamdyq qor quryldy.