Senatorlar orman sharýashylyǵy qyzmetkerleriniń jalaqysyn kóterý máselesin talqylady
ASTANA. KAZINFORM – Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary «Orman sharýashylyǵy jáne janýarlar dúnıesi qyzmetkerleriniń salalyq kásipodaǵy» respýblıkalyq jáne óńirlik fılıaldarynyń, sondaı-aq múddeli memlekettik organdardyń ókilderimen kezdesti. Kezdesýge qatysýshylar orman sharýashylyǵy qyzmetkerleriniń jalaqysyn kóterý jáne ústemeaqy tóleý máselelerin talqylady.
Senat depýtaty Olga Býlavkına orman sharýashylyǵy qyzmetkerlerine tólenetin eńbekaqy respýblıka boıynsha eń tómen ekenin atap ótti. Qostanaı oblysyndaǵy orman órti men Abaı oblysyndaǵy qaıǵyly oqıǵaǵa ulasqan ekologııalyq apattar orman sharýashylyǵy qyzmetkerleriniń jumysy men eńbekaqy mólsheri sáıkes emestigin jáne áleýmettik shıelenis týý qaýpin atap ótti.
«Orman órtiniń jıilep ketýi, ormandy zańsyz kesý, brakonerlik, ruqsat etilmegen jerlerge qoqystyń jınalýy, qorshaǵan ortanyń lastanýy, sonyń nátıjesinde sırek kezdesetin ósimdik túrleri men tabıǵı resýrstardyń joıylýy el ekonomıkasyna orasan zor zalal keltirip qana qoımaı, árbir turǵynnyń ál-aýqatyna da áser etedi. Másele órtke qarsy profılaktıkalyq jumystardy nashar uıymdastyrý men orman órtine ýaqytyly áreket etpeýden týyndaıdy. Materıaldyq-tehnıkalyq bazanyń azdyǵy, orman salasy qyzmetkerleriniń eńbek jaǵdaıynyń talapqa saı bolmaýy, osy sala qyzmetkerleriniń jalaqysy men áleýmettik qoldaý deńgeıiniń tómendigi, sondaı-aq kadrlardyń jetispeýshiligi teris áser etedi», - dedi Olga Býlavkına.
Orman sharýashylyǵy jáne janýarlar dúnıesi komıtetiniń ókili óz kezeginde bul máseleni sheshý maqsatynda Ekologııa mınıstrligi Orman sharýashylyǵy qyzmetkerleriniń salalyq kásipodaǵymen birlesip, bıýdjet qarjysy men aqyly qyzmetterdi únemdeý esebinen tabıǵatty qorǵaý uıymdarynyń shtattan tys jumysshylary men shtatqa kiretin ákimshilik qyzmetshilerdiń jalaqysyn ulǵaıtý múmkindigin kózdeıtin kelisim jasasqanyn atap ótti.
