Senatorlar «oralman» termınine qatysty máseleni taǵy kóterdi
ASTANA. QazAqparat Búgin Senattyń jalpy otyrysynda kóshi-qon máselesine qatysty zańdy talqylaý barysynda senator Jabaı Erǵalıev «oralman» termınine qatysty máseleni kóterdi.
«Osy «oralman» termıniniń tóńireginde úlken talastar bar. Buǵan da kózqarasty ózgertetin kez keldi. Atamekenine oralyp otyrǵandar sol memlekette týǵan azamattar, al Qazaqstannan ketkender olardyń ata-babalary bolatyn. Eger buryn ketkender bolsa, solar qaıta kelse, olardy «oralman» dep ataýǵa bolatyn edi. Al qazirgi kelip jatqandar negizinen Qytaıdyń, Ózbekstannyń, Mońǵolııanyń, Túrkııanyń azamattary, olardy, shet eldegi etnıkalyq qazaqtardy «oralman» deý qısynsyz, olardy Qazaqstanǵa qonys aýdarýshy etnıkalyq qandastar degen jón sekildi», deıdi senator Jabal Erǵalıev.
Eske salsaq, jaqynda zań jobasy Senat komıtetinde talqylanǵanda depýtat Ikram Adyrbekov «oralman» termınin qaıta qaraýdy usynǵan bolatyn. «Eger bizde bir uǵym, qandaı da termın paıda bolsa, soǵan aıaǵyna deıin baılanyp qalamyz. Qazirgi kúni bizde «oralman» termıniniń ózi birshama keri túsinik týdyryp júr. Azamattyq alǵandar ózderiniń mártebesin aýystyryp, «oralman» mártebesinen aıyrylady dep jatyr - buǵan kelispeımin. Óıtkeni, basynan bastap oǵan «oralman» degendikten ol aýyldastary úshin de, sol óńir úshin de oralman bolyp qala beredi. Nege ýaqytynda durys termın qabyldanbaǵan, máselen «baýyrlas», «otandas» sekildi? Búgingi úderisti eskere otyryp, bul termındi qaıta qarastyrý kerek dep oılaımyn. Sol qandastarymyzdyń ózderin qatystyra otyryp talqylasaq, biz budan áldeqaıda laıyqty termın taba alamyz dep senemin», - degen edi senator.
