Senatorlar múgedek balalar sanynyń artyp bara jatqanyna alańdaýly
Búgin QR Parlamenti Senatynyń ǵımaratynda Inklıýzııa jónindegi keńestiń otyrysy boldy. Ol «Balalar múgedektiginiń ósý máseleleri: erte aralasý, vedomstvoaralyq tásil» taqyrybyna arnaldy.
Keńes tóraǵasy Lázzat Qaltaeva otyrysty asha kelip, elimizde múgedek balalar sanynyń ósip bara jatqanyna jan-jaqty toqtaldy.
«Syrqatqa tap bolǵan balalar bizdiń júıede 3 jastan keıin baryp qamtylady. Sol kezde qaýipti toptaǵy balalardy anyqtaý jáne muqtaj jandarǵa ýaqtyly kómek kórsetetin eń qolaıly ýaqytty jiberip alady. Biz álemde jáne Qazaqstanda qalyptasqan jaǵdaılarǵa salystyrmaly túrde taldaý jasaýymyz kerek. Balalardyń múgedektik sebebiniń negizgi qurylymyn jáne bul erekshe balanyń otbasynyń áleýmettik deńgeıine qalaı baılanysty ekenin túsiný kerek», - dedi Lázzat Qaltaeva.
Senatorlar erekshe balalardy damytý jáne balany múgedektik tobyna jatqyzýdy kútpeı, problema anyqtalǵan sátten bastap emdeý sharasyn ýaqytynda bastaý máselelerin kezdesýge qatysýshylarmen birge talqylady.
Shara barysynda eńbek jáne halyqty áleýmettik qorǵaý mınıstriniń orynbasary Nazgúl Saǵyndyqova sóz alyp, mınıstrliktiń osy baǵyttaǵy jumysy týraly keńes múshelerine aıtyp berdi. Ol múgedek balalardy ınnovatsııalyq tehnıkalyq ońaltý quraldarymen qamtamasyz etýge jáne shaǵyn jáne mıkro ońaltý ortalyqtaryn qurýǵa baǵyttalǵan «Tehnıkalyq ońaltý quraldarynyń ınnovatsııalyq fabrıkasy» atty iske asyrylyp jatqan joba týraly habarlady.
Otyrys jumysyna densaýlyq saqtaý, aǵartý, mádenıet jáne aqparat mınıstrleriniń orynbasarlary, sondaı-aq sarapshylar men múddeli qoǵamdyq birlestikterdiń ókilderi qatysty.
