Senatorlar memlekettik qyzmet kórsetýden bas tartýdyń negizderine arnalǵan zań jobasyn talqylady
ASTANA. QazAqparat - Senattyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine memlekettik qyzmetter kórsetý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda talqylandy.
Memlekettik qyzmet isteri vıtse-mınıstri Aıgúl Sháıimovanyń aıtýynsha, vedomstvo senetorlar tarapynan usynylǵan túzetýlerdiń barlyǵyn qoldaıdy. Sonyń ishinde senator Bektas Beknazarovtyń «A» jáne «B» korpýsyna memlekettik qyzmetke qabyldaý barysynda is basyndaǵy sýdıalarǵa qatysty keıbir shekteýler alynyp tastalǵan.
Eske salaıyq, buǵan deıin birinshi oqylymda maquldanǵan qujattyń maqsaty - memlekettik qyzmetter kórsetý salasyndaǵy zańnamany jetildirý, atap aıtqanda uǵymdyq aqparatty tolyqtyryp, zańnama deńgeıinde memlekettik qyzmetter kórsetýden bas tartýdyń negizderin birizdendirý bolyp tabylady. Konstıtýtsııaǵa sáıkes, adamnyń jáne azamattardyń quqy men bostandyǵy tek zań arqyly ǵana shekteledi. Sonyń ózinde de bul shekteýler konstıtýtsııalyq qurylymdy qorǵaý, qoǵamdyq tártipti saqtaý, basqa adamdardyń quqy men bostandyǵyn, halyqtyń densaýlyǵyn saqtaý maqsatynda zańdyq negizde ǵana qarastyrylady. Sondaı-aq, «Memlekettik qyzmetter týraly» qoldanystaǵy zańǵa sáıkes memlekettik qyzmet kórsetýden bas tartý úshin negizdemeler Qazaqstannyń zańdarymen belgilenedi. Máselen, memlekettik qyzmet kórsetýshi qyzmet kórsetýden bas tartqan jaǵdaıda bul jaıynda qyzmet alýshyǵa bas tartý sebepterin kórsete otyryp, jaýap joldaıtyn bolady. Budan bólek, memlekettik qyzmet kórsetýden bas tartýǵa qatysty biryńǵaı negizdemeler tizimi bekitiledi.
Zań jobasyna sáıkes, «Memlekettik qyzmet týraly» zańnyń keıbir olqylyqtary joıylady. Sonymen qatar, elimizdegi memlekettik qyzmettiń jaǵdaıy týraly jyl saıynǵy ulttyq baıandama ázárleý talaby belgilenip otyr. Budan bólek, jańadan qurylǵan Memlekettik qyzmet isteri mınıstrliginiń quzyretine qatysty túzetýler qamtylyp otyr.
Zań jobasy palatanyń aldaǵy ýaqytta ótetin jalpy otyrysyna ekinshi oqylymda talqylaýǵa shyǵarylmaq.
