Senatorlar Memleket basshysynyń Joldaýyn túsindirý maqsatynda el aımaqtarynda júr

Almaty tehnologııalyq ýnıversıtetiniń professorlyq-oqytýshylar quramy jáne stýdentterimen kezdesýinde A.Bıjanov Memleket basshysynyń Qazaqstan halqyna Joldaýy týraly jan-jaqty habardar etti. 500-den astam adam qatysqan kezdesýde joǵary oqý ornynyń oqytýshylary men stýdentteri Qazaqstannyń 2050 jylǵa deıingi damý strategııasyna qoldaý bildirip, Joldaýdyń negizgi baǵyttaryn iske asyrý josparlary belgilendi. Bilim berý sapasyn arttyrý, jastarǵa qoldaý bildirý, ǵylymǵa negizdelgen ekonomıkany damytý máselelerine erekshe nazar aýdaryldy. Sondaı-aq, búgin Senat depýtaty Erlan Nyǵmatýlın jáne Májilis depýtaty Muhtar Tinikeev pen Vıktor Rogalev Qazaqstan Respýblıkasynyń Prezıdenti N.Á.Nazarbaevtyń «Qazaqstan joly - 2050: Bir maqsat, bir múdde, bir bolashaq» Joldaýyn túsindirý jóninde Balqash qalasynda saılaýshylarmen birqatar kezdesýler ótkizdi.

Júzdesý barysynda qala turǵyndary elimizdiń Prezıdenti N.Nazarbaev júrgizip kele jatqan saıasatqa qoldaý bildirip, Memleket basshysynyń Joldaýyna erekshe nazar aýdardy. Memlekettik deńgeıde júzege asyp jatqan jastar baǵdarlamasynyń barysy týraly depýtattardyń oı-pikirleri yqylaspen tyńdaldy. Joldaýda alǵa qoıylǵan zor mindetterge zeıin qoıǵan qalanyń stýdentter qaýymy elimizdegi zańdardyń qabyldaný barysy, ásirese, EKSPO-2017 kórmesin ótkizýge ázirlik jumystary jáne atqarylǵan isterdiń aýqymy týraly aqparattarmen tanysty.

Aımaq saılaýshylary kólik ınfraqurylymyn damytý, logıstıkalyq qyzmet sektoryna erekshe qyzyǵýshylyq tanytty. Qalalyqtar Balqash arqyly ótetin «Almaty - Astana» avtomobıl jolynyń qurylysyna nazar aýdardy. Sonymen qatar 2011-2020 jyldardaǵy turǵyn úı-kommýnaldyq sharýashylyǵyn jańǵyrtý týraly memlekettik baǵdarlamasyn iske asyrý týraly suraqtar qoıylyp, onyń barysynda páter ıelerine aýyrtpalyq túsirmeýdi kózdeıtin birqatar usynystar aıtyldy.

Qoıylǵan barlyq saýaldarǵa depýtattar jan-jaqty jaýap berip, zań shyǵarý barysynda saılaýshylardyń usynystary eskeriletinin aıtty.

Aqmola oblysynda júrgen senator J.Erǵalıev búgin Jaqsy, Esil, Jarqaıyń aýdandarynda boldy. Onyń jergilikti máslıhattardyń depýtattarymen, aýyl ákimderimen jáne jastarmen bolǵan kezdesýlerinde Elbasynyń «Qazaqstan-2050: Bir maqsat, bir múdde, bir bolashaq» atty Qazaqstan halqyna arnaǵan Joldaýynyń tarıhı mańyzy basty taqyryp boldy.

«Qazaqstan damýdyń jańa kezeńine shyqty. Elbasy Qazaqstannyń 2050 jyly álemniń damyǵan 30 eliniń qataryna ený mindetin qoıa otyryp, bıik mejege qol jetkizýdiń naqty baǵyttaryn aıqyndap berdi. Elimizde júrgizile bastaǵan Indýstrııalandyrý baǵdarlamasyn oıdaǵydaı júzege asyrý, el birligin saqtaý, bilim men ǵylymdy damytý sııaqty keleli mindetter bizdiń tabysqa jetýimizdiń basty kepili», - dep atap ótti depýtat.

Joldaý jaıynda pikir almasý barysynda jurtshylyq ókilderi Elbasynyń Máńgilik El bolý týraly aıtqan oılarynan zor áser alǵandyǵy jáne ol bizdiń halqymyzdyń uly muraty bolýǵa tıisti ekeni jóninde óz pikirlerin ortaǵa saldy. Aýyl turǵyndary sonymen qatar ózderin tolǵandyryp otyrǵan máselelerdi de kóterdi. Atap aıtqanda, olar shaǵyn mektepterdiń materıaldyq-tehnıkalyq bazasyn jaqsartýdy jáne qys aılarynda joldardy qardan tazartý, arshý jumystary keshiktirilmeı júrgizilse eken degen tilekterin jetkizdi.

Al Senat depýtaty, Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy Serik Aqylbaı Prezıdent N.Nazarbaevtyń Joldaýyna oraı Qaraǵandy oblysynda túsindirý jumystaryn júrgizdi.

Qarajal qalasyndaǵy Mádenıet saraıynda ótken qala turǵyndarymen kezdesýde senator Memleket basshysy jarııa etken «Máńgilik El» ulttyq ıdeıasynyń mánine egjeı-tegjeıli toqtaldy. Depýtat bul ıdeıanyń tarıhı negizderine jáne elimizdegi keleshek urpaqtyń órkendeı berýin qamtamasyz etý qajettigine nazar aýdardy. S.Aqylbaı odan keıin «Nur Otan» ǵımaratynda Aqsaqaldar keńesiniń ókilderimen jáne quqyq qorǵaý organdarynyń qyzmetkerlerimen de kezdesip, quqyq qorǵaý jáne sot júıesin odan ári reformalaýdaǵy negizgi máselelerge toqtaldy jáne Azamattyq-is júrgizý kodeksin qabyldaý qajettigin aıtty.

Búgin senator «Jáırem ken baıytý kombınaty» AQ jumysymen tanysyp, eńbek ujymymen kezdesti. Júzdesýde Elbasy Joldaýynyń negizgi erejeleri talqylanyp, elimizdiń ataýy jaıynda jan-jaqty áńgime boldy. Ken-baıytý kombınatynyń qyzmetkerleri Qazaqstannyń ataýyn ózgertý týraly Elbasynyń usynysyna qoldaý bildirdi.

Prezıdent Joldaýyn Parlament depýtattary Jambyl oblysynda da túsindirýde. Senatorlar Ertarǵyn Astaev, Sergeı Gromov jáne Aleksandr Savchenko osy aımaqta Memleket basshysynyń Joldaýyn túsindirý jumystaryna atsalysty.

Depýtattar kezdesý barysynda «Memleket basshysynyń «Qazaqstan joly - 2050: Bir maqsat, bir múdde, bir bolashaq» Joldaýynda buryn qabyldanǵan «Qazaqstan - 2050» strategııasyn iske asyrýdaǵy memleket pen qoǵamdy damytýdyń naqty maqsattary men negizgi baǵyttaryn aıqyndaýmen qatar, oǵan qol jetkizýdiń tetikteri men joldary jáne ádisteriniń aıtylýymen erekshe tarıhı sıpatqa ıe», - dep atap ótti.

Senatorlar «Ońtústik» aımaqtyq áskerı basqarmasynda bolyp, áskerı qyzmetshilermen, traktorlardyń qosalqy bólshekterin shyǵaratyn zaýyttyń, teri-bylǵary aıaq kıim birlestiginiń, qant kombınatynyń eńbek ujymdarymen kezdesti, sondaı-aq aýdandardyń áleýmettik-ekonomıkalyq damý barysymen tanysty.