Senatorlar kvazımemlekettik sektordyń bıýdjet qarjysyn tıimdi paıdalanýdy talqylady
Senattyń Qarjy jáne bıýdjet komıtetiniń tóraǵasy Olga Perepechına Memleket basshysynyń Qazaqstan halqyna Joldaýynda kvazımemlekettik sektordyń qaıtarymyn arttyrýdy negizgi mindetterdiń biri retinde belgilegenin atap ótti.
«Búgingi tańda kvazımemlekettik sektor jarǵylyq kapıtaldy tolyqtyrý, bıýdjetten nesıeleý jáne t.b. arqyly Ulttyq qor men memlekettik bıýdjetten qandaı túrde bolsa da jyl saıyn dotatsııalanyp keledi. Al sońǵy jyldarda shyǵyndar, rentabeldiliktiń tómendeýi jáne menshik ıesi – memleketke tólenetin dıvıdendter kvazımemlekettik sektordyń jekelegen sýbektileri qyzmetiniń nátıjeleri bolyp otyr», - dedi Olga Perepechına.
Respýblıkalyq bıýdjettiń atqarylýyn baqylaý jónindegi esep komıteti kvazımemlekettik sektor kompanııalarynda júrgizilgen aýdıt qorytyndylary týraly senatorlardy habardar etti. Baıandamada basqarý menedjmentiniń tıimdiligi áli de jetkiliksiz ekendigi jıi kezdesip qalatyny aıtyldy. Sonymen qatar osy sektordyń memlekettik qarjylandyrý kózderine táýeldi bolý basymdyǵy burynǵysha saqtalyp otyr.
Ulttyq ekonomıka mınıstrliginiń ókilderi kvazımemlekettik sektordyń qyzmetin, mindetteri men ólshemsharttaryn naqty ajyratý, qarjy tártibin jaqsartý, memlekettiń ekonomıkadaǵy úlesin tómendetý, monıtorıng pen baǵalaýdyń tıimdiligin arttyrý, sondaı-aq korporatıvtik basqarýdy kúsheıtý qajet dep esepteıdi.
Dóńgelek ústel barysynda ulttyq ekonomıka, qarjy mınıstrlikteriniń ókilderi jáne Senat janyndaǵy Jas sarapshylar klýbynyń músheleri kvazımemlekettik sektordyń bıýdjet qarjysyn paıdalanýdyń tıimdiligin arttyrý jóninde baıandama jasady.
Senatorlar kezdesý qorytyndysynda kvazımemlekettik sektor sýbektileri qyzmetiniń strategııalyq damýynda, qarjy-sharýashylyq qyzmetti júzege asyrý men korporatıvtik basqarýda kompanııalardyń nátıjeli isine teris áser etetin jáne jedel sheshýdi talap etetin birqatar júıeli problemalar bar ekenin aıtty.
