Senatorlar kreatıvti ındýstrııany damytatyn zańdy talqylaıdy
ASTANA. KAZINFORM – Búgin Senattyń jalpy otyrysy ótedi. Onda senatorlar kreatıvti ındýstrııalardy qoldaýǵa baǵyttalǵan zańdy jan-jaqty talqyǵa salady.
Aıta keterligi, «Qazaqstan Respýblıkasynyń keıbir zańnamalyq aktilerine kreatıvti ındýstrııalardy qoldaý jáne damytý máseleleri boıynsha ózgerister men tolyqtyrýlar engizý týraly» zańdy Májilis ótken jyldyń jeltoqsan aıynda qabyldaǵan edi. Sol kezde qujat boıynsha negizgi baıandama jasaǵan Májilis depýtaty Nurgúl Taý zań kreatıvti qyzmetti júzege asyrý tártibin odan ári retteýge baǵyttalǵan atap ótti.
- «Kreatıvti ındýstrııa qyzmetkeri» jáne «kreatıvti ındýstrııa sýbektileriniń tizilimi» uǵymdary engiziledi. Mádenıet jáne aqparat mınıstrliginiń kreatıvti ındýstrııalar salasyndaǵy jobalarǵa jeke ınvestıtsııalardy tartý monıtorıngin júrgizý quzyreti belgilendi. Ákimdikterge kreatıvti ındýstrııalar salasyndaǵy kásipkerlikti damytý arqyly áleýetti ashý jáne talanttardy damytý úshin jaǵdaı jasaý quzyreti beriledi. Shyǵarmashylyq jáne kásibı damý erkindigi maqsatynda kreatıvti ındýstrııa qyzmetkerleriniń quqyqtaryn qorǵaý jónindegi normalar kózdelgen, — degen edi ol.
Nurgúl Taýdyń aıtýynsha, zań jobasymen jumys barysynda depýtattar mynadaı túzetýler engizdi:
- «Mádenıet týraly» Zańda memlekettik qoldaý sharalaryn alýǵa úmitker kreatıvti ındýstrııa sýbektileriniń biryńǵaı tizilimin qalyptastyrý jáne júrgizý jónindegi ýákiletti organnyń quzyreti tolyqtyryldy;
- «Memlekettik jastar saıasaty týraly» Zańda jastardy kreatıvti ındýstrııaǵa tartý sharalaryn, onyń ishinde jastardyń kreatıvti bastamalary men jobalaryn qoldaý arqyly qamtamasyz etý jónindegi ýákiletti organnyń quzyreti tolyqtyryldy. Sondaı-aq jastardy kreatıvti ındýstrııa salasyna tartýǵa járdemdesý bóliginde memlekettik jastar saıasatynyń negizgi baǵyttary keńeıtildi;
- «Kınematografııa týraly» Zańda ulttyq fılmder shyǵarýǵa bólinetin qarajat kólemin aıqyndaý jónindegi ýákiletti organnyń quzyreti naqtylandy.
— Budan basqa, Úkimet usynysy boıynsha zań jobasyna sheteldik ártisterdiń qatysýymen oıyn-saýyq mádenı-buqaralyq is-sharalardy ótkizý kezinde is-sharalardy uıymdastyrýshylardyń qyzmetin reglamentteý; kınoprokatqa arnalǵan fılmderge prokat kýáligin berý tártibin ózgertý boıynsha usynymdar engizildi. Sonymen birge, depýtattar redaktsııalyq sıpattaǵy túzetýler men normalardy zań tehnıkasyna sáıkes keltirýge baǵyttalǵan, zań jobasynyń mazmunyn sapaly jaqsartqan túzetýlerdi engizdi, — dedi Májilis depýtaty.
Esterińizge sala ketsek, ótken aptadaǵy palatanyń jalpy otyrysynda senatorlar «Qazaqstan Respýblıkasynyń Úkimeti men OPEC Halyqaralyq damý qory arasyndaǵy jeke sektordaǵy operatsııalardy uıymdastyrý týraly negizdemelik kelisimdi ratıfıkatsııalaý týraly» zańdy maquldady.
Senator Sáken Arýbaevtyń aıtýynsha, bul kelisim memleketimizdiń ekonomıkasynyń ósýine jáne onyń turaqtylyǵyn arttyrýǵa yqpal etýge baǵyttalǵan. Kelisimniń negizgi maqsaty - qazaqstandyq jeke kompanııalardyń ORES qorynyń qarjy quraldaryna qol jetkizýin jeńildetý úshin turaqty platforma qurý. OPEC Halyqaralyq damý qorynyń negizgi mıssııasy – damýshy elderdiń áleýmettik-ekonomıkalyq damýyn qoldaý.
- Qor 50 jyl ishinde álemniń 125 elinde 4 myńnan astam jobany iske asyryp, jalpy somasy 30 mlrd AQSh dollarynan astam qarjy bóldi. Sońǵy 20 jylda Ortalyq Azııa elderine 1,4 mlrd AQSh dollarynan astam ınvestıtsııa tartylǵan. Atap aıtqanda, kelisim normalary uzaq merzimdi qarjylandyrýdy, ınvestıtsııalardy qorǵaýdy jáne yntymaqtastyqtyń ıkemdi sharttaryn qamtamasyz etýge negizdelgen, - dedi senator.
Zań normalarymen Qazaqstan aýmaǵynda ORES qory tolyq zańdy tulǵa retinde tanylyp, tikeleı salyqtardan bosatylyp, sondaı-aq oǵan halyqaralyq uıymdarǵa qatysty ımmýnıtetter men artyqshylyqtar berilip otyr. Qorǵa memlekettik kepildikter berý qajet emes bolǵanymen, jeke sektor jobalary Úkimetpen kelisiletini qarastyrylǵan.
Qor qyzmetiniń negizgi baǵyttary mynalardy qamtıdy:
– ınfraqurylymdy salý jáne damytý;
– klımattyń ózgerýine qarsy sharalar;
– azyq-túlik qaýipsizdigi;
– energetıkalyq aýysymǵa járdemdesý;
– tsıfrlandyrý jáne ınnovatsııalar;
– shaǵyn jáne orta bızneske ekonomıkalyq múmkindikter jasaý.
Sondaı-aq palata depýtattary «Qazaqstan Respýblıkasynyń keıbir zańnamalyq aktilerine kúzet qyzmeti, turǵyn úı qatynastary jáne quqyq qorǵaý qyzmeti máseleleri boıynsha ózgerister men tolyqtyrýlar engizý týraly» zańdy qarap, maquldady.
Zańnyń negizgi maqsaty - kúzet qyzmetin júzege asyratyn sýbektilerdiń qyzmetin jetildirý, qarý ıelerine qoıylatyn talaptardy kúsheıtý, quqyq qorǵaý organdarynyń, arnaýly memlekettik organdardyń, azamattyq qorǵaý organdarynyń qyzmetkerleri men áskerı qyzmetshilerdi turǵyn úımen qamtamasyz etý jáne turǵyn úı tólemderin júzege asyrý tártibin jetildirý.
Zań normalary kúzet qyzmeti men qarý aınalymy salasyndaǵy memlekettik baqylaýdy kúsheıtýge jáne kúzet qyzmetterin usyný sapasyn arttyrýǵa arnalǵan. Zańnyń negizgi mindetteriniń qatarynda quqyq qorǵaý organdarynyń, arnaýly memlekettik organdardyń, azamattyq qorǵaý organdarynyń qyzmetkerleri men áskerı qyzmetshilerdi turǵyn úımen qamtamasyz etý jáne turǵyn úı tólemderin júzege asyrý tártibin jetildirý, sondaı-aq, quqyq qorǵaý organdaryndaǵy kadr saıasatynyń tıimdiligin arttyrý sııaqty naqty baǵyttar bar.
Palata otyrysynyń sońynda senatorlar halyqty alańdatqan ózekti máseleler týraly depýtattyq saýaldary joldady. Atap aıtqanda, Andreı Lýkın ınvestorlardyń quqyqtaryn qorǵaýdy qamtamasyz etý jáne eldegi ınvestıtsııalyq jobalardy iske asyrý jónindegi sharalardy kúsheıtý qajet ekenin aıtty. Onyń sózine qaraǵanda, bul baǵyttaǵy jumysty búginde róli formaldy bolyp qalyp otyrǵan Syrtqy ister mınıstrligi Investıtsııalar komıtetiniń fýnktsıonalyn qaıta qaraýdan bastaý kerek.
Al Bıbıgúl Jeksenbaı elimizdiń zııatkerlik, rýhanı jáne halyqaralyq bedelin qalyptastyrýda strategııalyq ról atqaratyn mańyzdy baǵyt – mádenıet salasyndaǵy problemalarǵa nazar aýdardy. Ol shyǵarmashylyq ınklıýzııany jetildirý, zamanaýı tsıfrlyq tehnologııalardy damytý, mamandardy kásibı jáne áleýmettik qoldaýdy qamtamasyz etý boıynsha zańnamalyq ózgerister men ulttyq standarttardy engizý máselesine qatysty mańyzdy usynystarǵa toqtaldy.