Senatorlar qorǵanys salasyndaǵy aldyńǵy qatarly kásiporyndarda boldy
ASTANA. QazAqparat - Búgin QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva bastaǵan komıtet músheleri elimizdiń qorǵanys salasyndaǵy aldyńǵy qatarly kásiporyndarda boldy, dep habarlaıdy QazAqparat tilshisi.
Senatorlar aldymen brondy tehnıka shyǵaratyn «Qazaqstan Paramaýnt Injınırıng» mashına jasaý kásipornyna baryp, qazirgi zamanǵy kúrdeli tehnıkanyń syrtqy «brondalǵan qabatynyń» qurylysynan bastap daıyn ónimge deıingi óndiris barysymen tanysty. Sondaı-aq kásiporynnyń joǵary tehnologııalyq múmkindikteri, onyń ishinde shyǵarylatyn árbir mashınany kez-kelgen tapsyrys berýshiniń talaptaryna beıimdeı alatyn konstrýktorlyq bıýronyń jumysyn kórdi.
«Qazaqstan Paramaýnt Injınırıng» mekemesiniń bas dırektory Erbol Sálimovtyń aıtýynsha, kompanııa otandyq satyp alýshylar qoıatyn talaptar arta tússe de ónimder qunyn tómendetýmen qatar, Qazaqstandy qorǵanys salasyndaǵy halyqaralyq naryǵyna laıyqty túrde pash etý úshin óndiris pen tehnologııalyq jelini keńeıtip otyr.
«Álemde qansha memleket bolsa da solardyń barlyǵy birdeı ózin qarý-jaraqpen, oq-dárimen qamtamasyz ete almaıdy. Oǵan biraz memleket qana qabiletti. Sondyqtan Táýelsizdik alǵannan keıin Bas áskerı qolbasshymyz otandyq áskerı kásipke aıryqsha kóńil bólip keledi. Sonyń nátıjesinde elimizde birneshe zaýyt ashylyp, jumys istep jatyr. Endigi maqsat qazaqstandyq qamtýdyń kólemin arttyryp, tipti bólshekterdi de ózimizde shyǵarýymyz qajet. Osy baǵytta jaqsy jumys júrgizilýde», - dedi zaýytty aralaý barysynda BAQ ókilderine suhbat bergen senator Nurjan Nursıpatov.
Aıta keteıik, 2015 jylǵy 20 qarashada Elbasy ashqan zaýyt mınadan qorǵanysy kúsheıtilgen brondy dóńgelekti mashına jasaýdyń jańa tehnologııasy boıynsha ásker men arnaýly bólimshelerge arnalǵan mashına shyǵarady. Olardyń asty 10 keli trotıl jarylǵyshy mólsherindegi jarylysqa shydaıtyn ballıstıkalyq joǵary qorǵanysqa ıe ári tasadan jasalǵan shabýyldarǵa tótep bere alady.
Zaýyt jumysy bastalǵannan beri tapsyrys berýshilerge arnap 4x4 dóńgelekti brondalǵan «Arlan» jáne «Alan» mashınalaryn shyǵarý jolǵa qoıyldy. 2018 jyldyń sońynda Qorǵanys mınıstrligine arnalǵan «Barys» 6h6 dóńgelekti bronetransporteri synaqtan ótti. Qazirgi ýaqytta zaýyt uńǵysy 30 mm bolatyn otandyq «Ańsar» zeńbiregimen qosarlanǵan 7,62 uńǵyly qashyqtan basqarylatyn pýlemet qondyrylǵan 8x8 dóńgelekti «Barys» bronetransporterin synaqtan ótkizýge kirisken.
Senatorlar sondaı-aq «Qazaqstan Aselsan Injınırıng» mekemesinde de boldy. Bul kompanııa túnde jáne kúndiz kórsete alatyn, jylý shyǵaratyn zattardy kóretin, barlaý aspaptary men kásibı baılanys quraldaryn óndirýge jáne satýǵa mamandanǵan. Elimizdiń Qarýly Kúshteri men basqa da áleýetti qurylymdar kásiporynnyń negizgi tapsyrys berýshileri jáne kompanııa ónimi quramynyń 58 paıyzy qazaqstandyq bolyp tabylady. 2017 jyly Túrkııa men Ózbekstanǵa eksporttyq kelisim jasaldy. Endi TMD elderi men shetelge de ónim shyǵarý josparlanyp otyr.
