Senatorlar qorǵanys-ónerkásip kesheniniń Astanadaǵy kásiporyndaryn aralady
ASTANA. KAZINFORM – Senattyń Halyqaralyq qatynastar, qorǵanys jáne qaýipsizdik komıtetiniń depýtattary qorǵanys-ónerkásip kesheniniń kásiporyndaryna bardy.
«Qazaqstan Aselsan ınjınırıng» kompanııasyn aralaý barysynda depýtattarǵa túnde kóretin jáne optıkalyq radıobaılanys aspaptary, elektrondyq platalardy jáne basqa da jabdyqtardy shyǵarý protsesi kórsetildi. Uıym 2023 jyldyń qorytyndysy boıynsha áskerı jáne azamattyq salanyń jalpy somasy 3 mlrd 461 mln teńge bolatyn 50-den astam shartty oryndady. Senatorlar sondaı-aq kásiporyn basshylyǵymen birlese otyryp, qosymsha qarjy bólý, uzaq merzimge josparlaý jáne keleshegi zor jańa jobalardy ázirleý máselelerin talqylady.
Parlamentshiler saýytty dońǵalaqty mashınalar jasaý, jóndeý jáne servıstik qyzmet kórsetýmen aınalysatyn «Qazaqstan Paramaýnt ınjınırıng» JShS jumysymen de tanysty. Senatorlarǵa saýytty dońǵalaqty mashınalardyń úlgileri men olardy daıyndaý, dánekerleý, boıaý tsehtarynyń jumysy kórsetildi.
Depýtattar sapar barysynda kásiporyn qyzmetkerlerimen kezdesti jáne salanyń damý keleshegine baılanysty máselelerdi talqylady. Qyzmetkerler jumys jaǵdaıyn jaqsartý, jańa tehnologııa engizý, sondaı-aq óndiris protsesteriniń tıimdiligin arttyrý jónindegi usynystaryn jetkizdi.
