Senatorlar kollektorlyq qyzmetke qatysty zań jobasyn «shıki» dep tapty

ASTANA. QazAqparat - QR Parlamenti Senaty «QR keıbir zańnamalyq aktilerine kollektorlyq qyzmet máseleleri boıynsha ózgerister men tolyqtyrýlar engizý týraly» zań jobasyn Parlament Májilisine keri qaıtardy, dep xabarlaıdy QazAqparat.

Senat otyrysynda depýtattar zań jobasyn qorǵaýǵa kelgen QR Ulttyq banktiń  tóraǵasy Danııar Aqyshevke kóp saýal qoıdy. Qujatta kereǵar tustar da jeterlik ekeni anyqtaldy. Osyǵan baılanysty senatorlar birneshe usynys engize otyryp, atalmysh zań jobasyn Májiliske qaıtarýdy uıǵardy.

«Zań jobasyn talqylaý jáne ony ekinshi oqylymǵa daıyndaý barysynda Senat komıtetteriniń eskertýleri men usynystaryn eskere otyryp, zań jobasyna ózgerister men tolyqtyrýlar engizý qajettigi týyndady», - dedi Senattyń Qarjy jáne bıýdjet komıtetiniń tóraǵasy R. Axmetov.