Senatorlar kollektorlyq qyzmet máselesin qaraıdy
ASTANA. QazAqparat - Ortalyq kommýnıkatsııalar qyzmetiniń resmı ókili Murat Jumanbaı depýtattardyń osy aptadaǵy jumys kestesin jarııalady, dep xabarlaıdy QazAqparat tilshisi.
Onyń aıtýynsha, erteń, naýryzdyń 28-i kúni Parlament Senatynyń ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysy ótedi. Onda aýa keńistigi men avıatsııa qyzmetin paıdalaný máseleleri boıynsha birqatar zańnamalyq aktilerine ózgertýler men tolyqtyrýlar engizý týraly zań jobasy talqylanady. Al naýryzdyń 29-30-y kúnderi Senattyń xalyqaralyq qatynastar, qorǵanys jáne qaýipsizdik komıtetiniń Ońtústik Qazaqstan oblysyndaǵy kóshpeli otyrysy uıymdastyrylyp, memlekettik shekarany qorǵaý máseleleri talqylanady degen jospar bar.
"Sársenbi kúni Senattyń qarjy jáne bıýdjet komıtetinde kollektorlyq qyzmet jáne oǵan ilespe zań jobasyn talqylaý boıynsha keńeıtilgen otyrys bolady. Naýryzdyń 30-y kúni áleýmettik-mádenı damý jáne ǵylym komıteti depýtattary mádenıet jáne sport mınıstrliginiń basshylyǵymen, teatr qaýymdastyǵy ókilderimen kezdesý ótkizedi. Kezdesýde mádenıet máseleleri jónindegi Qazaqstan Respýblıkasynyń birqatar zańnamalyq aktilerine ózgertýler men tolyqtyrýlar engizý týraly zań jobasyn talqylaý josparlanýda", - dep atap kórsetti Jumanbaı.
Sondaı-aq naýryzdyń 29-y kúni Parlament Májilisiniń plenarlyq otyrysy ótedi. Onda zańnamaǵa dene shynyqtyrý jáne sport máseleleri jónindegi túzetýler jobasy qaralady. Budan bólek, Májilis depýtattary xalyqaralyq jeke quqyq jónindegi Gaaga konferentsııasynyń jarǵysyn ratıfıkatsııalaý týraly zań jobasyn qaraıtyn bolady.
«Jarǵyny ratıfıkatsııalaý Qazaqstannyń Gaaga konferentsııasyna qosylýyna múmkindik beredi jáne Qazaqstan azamattarynyń múddesi men quqyqtaryn qorǵaý tıimdiligin arttyrýǵa, kópshilik maquldaǵan álemdik standarttardyń negizinde elimizdiń quqyqtyq júıesin nyǵaıtýǵa múmkindik beredi. Al naýryzdyń 30-y kúni Májilistiń qarjy jáne bıýdjet komıteti Qazaqstan Respýblıkasynyń keıbir zańnamalyq aktilerine bıýdjet zańnamasyn jetildirý boıynsha ózgerister men tolyqtyrýlar engizý týraly zańdy iske asyrýǵa arnalǵan "dóńgelek ústel" ótkizetin bolady»,- dedi OKQ resmı ókili.
