Senatorlar kóktemgi egis jumystary kezinde dızel baǵasyn 50 paıyzǵa arzandatýdy usyndy
NUR-SULTAN. QazAqparat – Parlament Senatynyń depýtattary Úkimetten sharýalarǵa arnalǵan dızel otynynyń 50 paıyzǵa deıin arzandatýdy usyndy. Osy problema boıynsha senatorlar Úkimet basshysyna depýtattyq saýal joldap otyr, dep habarlaıdy QazAqparat tilshisi.
«Kóktemgi dala jumystaryna bólingen jeńildetilgen janar-jaǵar maıdyń baǵasy áli de qymbat. Sońǵy eki aıdyń kóleminde álemdegi munaı baǵasy 2-2,5 ese tómendedi. Al bizdiń munaı óńdeý zaýyttarynan shyǵarylatyn dızeldik otynnyń baǵasy 10 paıyzǵa ǵana arzandaǵan. Bıylǵy jyldyń 1 naýryzyna dızel otynynyń 1 tonnasy 194 myń teńge bolsa, búgin 174 myń teńgeni qurap otyr. ıAǵnı 1 lıtrine 145 teńgeden keledi. Olaı bolsa aýylsharýashylyǵy taýar óndirýshileri nege 165 teńgeden alýy kerek?» - dedi onlaın rejimde ótken Senat otyrysynda depýtattyq saýaldy oqyǵan senator Álı Bektaev.
Senatorlardyń paıymdaýynsha kóktemgi dala jumystary úshin arzandatylǵan janar-jaǵar maıdyń baǵasy kóshedegi maı quıý beketterindegi emes, munaı óńdeý zaýyttaryndaǵy baǵadan 15 paıyzǵa tómen bolýy tıis.
«Qazirgi qıyn-qystaý kezeńde memleketimizdiń azyq-túlik qaýipsizdigin qamtamasyz etý úshin munaı óńdeý zaýyttarynyń aktsıonerleri de, tıisti mınıstrlik basshylary da óziniń azamattyq pozıtsııalaryn tanytýy qajet dep esepteımiz. Osylardyń barlyǵyn eskere otyryp, QR Úkimetine kóktemgi dala jumystaryna bólinetin janar-jaǵar maıdyń baǵasyn 50 paıyzǵa deıin arzandatyp, sharýalarǵa ýaqtyly jetkizýdiń múmkindikterin qarastyrýdy usynamyz», - deıdi Álı Bektaev.
